ព័ត៌មានជាតិ

សមត្ថកិច្ចត្រៀមហៅម្ចាស់ហាងមកសាកសួរ ពាក់ព័ន្ធកញ្ចុះមានវាំងនន បិទបាំង

បានផុស

២ years មុន

នៅ

ថ្ងៃចន្ទ ៥ មិថុនា ២០២៣

ដោយ

បាត់ដំបង ៖ បច្ចុប្បន្នគេសង្កេតឃើញថា ភោជនីយដ្ឋាន និងអាហារដ្ឋានមួយចំនួនតូច នៅក្នុងខេត្តបាត់ដំបង មានការដំឡើងវាំងននបិទបាំងកញ្ចុះ ដែលភ្ញៀវចូលអង្គុយផឹកស៊ី ដែលបង្កការរិះគន់យ៉ាងខ្លាំងពីសំណាក់អ្នកយល់ច្បាប់ ប៉ុន្តែវាក៏ជាឱកាសល្អសម្រាប់អ្នកខិលខូច ដែលចូលចិត្តសេវាបែបនេះ ដើម្បីគេចពីភ្នែកមនុស្សនានាដែលចូលទៅពិសាអាហារនៅទីនោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងគឺនៅក្នុងអាហារដ្ឋានមួយកន្លែង យីហោ “ម្លប់ត្រជាក់” ដែលមានទីតាំងនៅតាមបណ្តោយដងស្ទឹងសង្កែ ត្រើយខាងកើត ក្នុងភូមិឡឥដ្ឋ សង្កាត់ព្រែកព្រះស្តេច ក្រុងបាត់ដំបង ដែលជាអាហារដ្ឋានមួយ នៅក្នុងចំណោមអាហារដ្ឋានជាច្រើនដែលនៅជាប់ៗគ្នា។

នៅក្នុងអាហារដ្ឋានមួយនេះ គេសង្កេតឃើញថា មានកញ្ចុះជាច្រើន ដែលកញ្ចុះនីមួយៗ មានចងវាំងននចំនួនពីរផ្ទាំង ពណ៌ស្លាទុំ ដែលវាំងននខ្លះត្រូវបានរូតបិទ ខណៈមានភ្ញៀវអង្គុយនៅខាងក្នុងដែលពួកគាត់ត្រូវការសេវាងងឹតៗ ឯវាំងននខ្លះទៀតនៅចំហដោយសារមិនទាន់មានភ្ញៀវចូលអង្គុយ។

លោកវរសេនីយ៍ឯក ប៊ន វណ្ណារ៉ា នាយការិយាល័យ ប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបាត់ដំបង បានមានប្រសាសន៍ប្រាប់កម្ពុជាថ្មី នាព្រឹកថ្ងៃទី៥ ខែមិថុនា ឆ្នាំ២០២៣ នេះថា វាជាករណីខុសច្បាប់ទាំងស្រុង សម្រាប់ការដាក់វាំងនននៅតាមកញ្ចុះដើម្បីបិទបាំងបម្រើសេវាភ្ញៀវ។

លោកក៏បានសង្កត់ធ្ងន់ថា សម្រាប់កញ្ចុះនីមួយៗ ត្រូវការរងស្បូវឱ្យបានខ្ពស់ ជៀសវាងការទុកឱ្យសំយាបធ្លាក់ទាបពេក ហើយម្យ៉ាងទៀតកម្លាំងការិយាល័យរបស់លោកក៏ធ្លាប់បានចុះផ្សព្វផ្សាយអំពីបញ្ហានេះរួចមកហើយដែរ ប៉ុន្តែទីតាំងខ្លះនៅតែផ្គើននិងបទបញ្ជានេះដដែល ដូច្នេះសម្រាប់អាហារដ្ឋានខាងលើ លោកនឹងឱ្យកម្លាំងចុះទៅធ្វើការក្នុងពេលឆាប់ៗខាងមុខនេះ និងអោយម្ចាស់ហាងធ្វើកិច្ចសន្យាបញ្ឈប់ជាបន្ទាន់នូវសកម្មភាពល្មើសច្បាប់នេះ៕

អត្ថបទ ៖ សោ និយមរ័ត្ន