ACCB បានដើរតួនាទីសំខាន់នៅក្នុងការចូលរួមការពារ និងការអភិរក្សសត្វព្រៃ

មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) បានដើតួនាទីយ៉ាងសំខាន់ក្នុងការផ្តល់ការព្យាបាលថែទាំ ថែរក្សាអភិរក្ស ដល់សត្វកម្រៗនានា ដែលបានមកពីការសង្គ្រោះពីការជួញដូរ និងរងរបួសដោយសារការដាក់អន្ទាក់ ការបរបាញ់ និងកត្តាផ្សេងៗទៀត។

កញ្ញា Christel Griffioen ដែលជានាយិកាមជ្ឈមណ្ឌលអង្គរសម្រាប់ការអភិរក្សជីវៈចម្រុះ បានឱ្យដឹងថាជ្ឈមណ្ឌលនេះ ជាមជ្ឈមណ្ឌលអភិរក្សប្រភេទរបស់សួនសត្វអាល់វិតធឿស្សូម៉ឹនស្ទឿ ប្រទេសអាល្លឺម៉ង ត្រូវបានបង្កើតឡើងនៅកម្ពុជាក្នុងឆ្នាំ ២០០៣ ក្នុងគោលបំណងដើម្បីការអភិរក្សបង្កាត់ពូជ, ការសង្គ្រោះនិងស្តារនីតិសម្បទា, ការអប់រំផ្សព្វផ្សាយ និងការសិក្សាស្រាវជ្រាវ។ ​

កញ្ញាបានបញ្ជាក់បន្ថែមថា កាលពីឆ្នាំ២០២២ កន្លងទៅ សត្វព្រៃដែលរងគ្រោះគំរាមកំហែងចំនួន​៥៨ ក្បាលត្រូវបានជួយសង្គ្រោះ, សត្វព្រៃដែលរងការគំរាមកំហែងចំនួន ៩៣ ក្បាលត្រូវបានលែង និងសត្វព្រៃចំនួន ១០ ក្បាលត្រូវបានផ្ទេរទៅឱ្យអង្គការដៃគូ។ ជាមួយគ្នានេះ សត្វចំនួន ១៨៥ ក្បាលបានកើតនៅក្នុងកន្លែងអភិរក្សកម្មវិធីបង្កាត់ពូជ។

មជ្ឈមណ្ឌលអង្គរសម្រាប់ការអភិរក្សជីវៈចម្រុះ (ACCB) បានធ្វើកិច្ចសហការយ៉ាងជិតស្និទ្ធជាមួយក្រសួងបរិស្ថាន រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ ក៏ដូចជា អង្គការដៃគូអភិរក្សនានា ដើម្បីការពារ និងអភិរក្សសត្វព្រៃកម្រៗ និងអនុវត្តកម្មវិធីបង្កាត់ពូជ។ មជ្ឈមណ្ឌល ACCB បានផ្តល់ជម្រកដល់សត្វព្រៃសរុបចំនួន ៩៦៥ ក្បាលក្នុងចំណោមសត្វ ៣០ ប្រភេទ ហើយ ៩៧%នៃសត្វទាំងនោះ គឺជាប្រភេទសត្វដែលរងការគំរាមកំហែង៕