ឥណ្ឌា ជួបហេតុការណ៍រន្ធត់មួយទៀត ក្រោយសោកនាដកម្ម រថភ្លើងបុកគ្នា (មានវីដេអូ)

សារព័ត៌មាន ANI បានរាយការណ៍កាលពីថ្ងៃចន្ទទី៥ខែមិថុនាថា ស្ពានខ្សែកាបមួយ ដែលកំពុងសាងសង់នៅក្នុងរដ្ឋ Bihar របស់ប្រទេសឥណ្ឌា បានបាក់ជាលើកទីពីរក្នុងរយៈពេល១៤ខែ ខណៈមនុស្សម្នាក់ត្រូវបាត់ខ្លួន។

ស្ពាននេះកំពុងត្រូវបានសាងសង់នៅលើទន្លេ គង្គា ក្នុងស្រុក Bhagalpur ភាគខាងកើតប្រទេសឥណ្ឌា។

ដំបូងឡើយ ការសាងសង់គ្រោងនឹងបញ្ចប់នៅឆ្នាំ២០១៩ ប៉ុន្តែត្រូវប្រឈមនឹងការពន្យារពេលជាច្រើនលើកច្រើនសា។ ក្នុងនោះ មានមួយលើក ដែលការសាងសង់ស្ពានត្រូវពន្យារពេល ដោយសារការបាក់បណ្តាលមកពីខ្យល់បក់ខ្លាំង និងភ្លៀង កាលពីថ្ងៃ៣០មេសាឆ្នាំមុន។

អ្នកស្រុកឈ្មោះ Rakesh Kumar បានប្រាប់ ANI ថា “មានការរញ្ជួយយ៉ាងខ្លាំងនៅទីនេះ យើងមានអារម្មណ៍ថាដូចជាមានការផ្ទុះ។ ក្រោយមក យើងបានស្ពានស្ពានបាក់”។

យោងតាមសារព័ត៌មាន ANI, មានបុរសចំនួន៨នាក់នៅលើស្ពាន ពេលដែលបាក់​ ខណៈអ្នកយាមម្នាក់ត្រូវបាត់ខ្លួន។

គួរបញ្ជាក់ថា ហេតុការណ៍នេះកើតឡើង បន្ទាប់ពីប្រទេសឥណ្ឌា​ ជួបប្រទះសោកនាដកម្មរថភ្លើងបុកគ្នា ដែលបណ្តាលឲ្យមនុស្សជិត៣០០នាក់ បាត់បង់ជីវិត។

សោកនាដកម្មផ្លូវដែក ដែលជារឿងដ៏អាក្រក់បំផុតរបស់ឥណ្ឌាក្នុងរយៈពេលប៉ុន្មានទសវត្សរ៍មកនេះ បានកើតឡើងកាលពីល្ងាចថ្ងៃសុក្រទី២ខែមិថុនា នៅស្ថានីយ៍មួយក្នុងរដ្ឋ Odisha៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA, RT

ចុចអាន៖ ដឹងមូលហេតុ ដែលបណ្តាលឲ្យរថភ្លើងបុកគ្នា ស្លាប់មនុស្សជិត ៣០០នាក់ នៅ ឥណ្ឌា