ខេត្តវៀតណាមជាប់កម្ពុជា កំពុងតាមរកជនសង្ស័យបន្ថែមទៀត ពាក់ព័ន្ធការវាយប្រហារប្រដាប់អាវុធ

មនុស្ស ១០ នាក់ទៀត ត្រូវបានចាប់ខ្លួនពីបទវាយប្រហារសម្លាប់មនុស្សកាលពីថ្ងៃអាទិត្យ ទី១១ ខែមិថុនា នៅក្នុងខេត្ត Dak Lak ដែលមានព្រំប្រទល់ជាប់ខេត្តមណ្ឌលគិរីនៃប្រទេសកម្ពុជា ដោយធ្វើឲ្យចំនួនមនុស្សដែលត្រូវចាប់ខ្លួន បានកើនដល់ ២៦ នាក់ហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងសន្តិសុខសាធារណៈលោក To An Xo បាននិយាយកាលពីថ្ងៃចន្ទថា រហូតមកដល់ពេលនេះ អាជ្ញាធរក៏កំពុងស្វែងរកអ្នកវាយប្រហារដែលនៅមិនទាន់ចាប់ខ្លួនបាននៅឡើយផងដែរ ។

យោងតាមក្រសួងបានឲ្យដឹងថា កាលពីព្រឹកថ្ងៃអាទិត្យ ជនមិនស្គាល់អត្តសញ្ញាណមួយក្រុម បានប្រើកាំភ្លើងវាយប្រហារការិយាល័យរបស់គណៈកម្មាធិការប្រជាជនឃុំ Ea Tieu និង Ea Ktur ក្នុងស្រុក Cu Kuin ដែលបណ្តាលឲ្យមនុស្សច្រើននាក់បាត់បង់ជីវិត ។

គិតត្រឹមល្ងាចថ្ងៃនោះ ជនសង្ស័យចំនួន ១៦ នាក់ ត្រូវបានចាប់ខ្លួន ហើយប៉ូលិសរំដោះបានចំណាប់ខ្មាំង ២ នាក់ ខណៈអាវុធ​មួយ​ចំនួន ​រួម​ទាំង​កាំភ្លើងផងដែរនោះ គឺ​ត្រូវ​បានរឹបអូស​ពី​ជន​សង្ស័យ ។

ក្រោយមក ស្ថានការណ៍ហាក់មានភាពធូរស្រាលនៅ​ក្នុង​ឃុំ​ទាំង​ពីរ ហើយ​ប្រជាពលរដ្ឋ​​មូលដ្ឋាន ​ត្រូវ​បាន​អនុញ្ញាត​ឲ្យធ្វើសកម្មភាពតាម​ធម្មតាឡើង​វិញផងដែរ ​៕

ប្រែសម្រួល៖ Vann Vann

ប្រភព៖ VN Express

ចុចអាន៖ វៀតណាម ព្យាករណ៍ពីកំណើន GDP ពេញមួយឆ្នាំ ២០២២ នេះ