​កំប្លោកអណ្ដែតកកកុញក្នុងទន្លេ ធ្វើឱ្យពលរដ្ឋជួបការលំបាកធ្វើដំណើរ​ឆ្លងទឹក

ក្នុងរដូវវស្សាដូចសព្វថ្ងៃនេះប្រជាពលរដ្ឋរស់នៅតាមដងទន្លេធ្វើដំណើរតាមផ្លូវទឹកពិតជាជួបការលំបាកយ៉ាងខ្លាំងដោយសារមានកំប្លោកអណ្ដែតពាសពេញព្រែក និងទន្លេមិនអាចធ្វើដំណើរចេញចូលបានលឿន និងកន្លែងតាមព្រែកតូចៗខ្លះមិនអាចទៅមកបានតែម្ដងចំពោះអ្នកមានកាណូតតូចៗ។ នៅស្រុកជ្រលគីរី ខេត្តកំពង់ឆ្នាំង មានកំប្លោកកកកុញច្រើន ធ្វើឱ្យការឆ្លងសាឡាងចំណាយពេលយូរ។

ម្ចាស់សាឡាងបានឲ្យដឹងថា ការឆ្លងទន្លេពេលនេះគឺលឿនហើយ ប្រសិនបើសាឡាងដឹករថយឬគ្រឿងចក្រធ្ងន់វិញ ការឆ្លងទន្លេពាមឆ្កោកកាត់កំបោងក្រាស់នេះគឺជាងមួយម៉ោងឯណោះ នឹងអស់ប្រេងពី ៤លីត្រទៅ ៦០លីត្រ ទើបឆ្លងរួច។

ដោយឡែក លោកអភិបាលខេត្តកំពង់ឆ្នាំងកន្លងមកក៏ធ្លាប់បានលើកឡើង និងផ្សព្វផ្សាយថា កំប្លោកនេះគេអាចកែច្នៃផលិតយកធ្វើជាមេតាណុល និងស្រាកំប្លោកបាន។ ដោយក្រុមការងាររបស់រដ្ឋបាលខេត្តបានទៅទស្សនកិច្ចសិក្សាបច្ចេកទេសនេះនៅប្រទេសជប៉ុន ហើយក៏បានទំនាក់ទំនងជាមួយក្រុមបច្ចេក ទេសប្រទេសជប៉ុនផងដែរដើម្បីអនុវត្តគម្រោងនេះនៅក្នុងទឹកដីខេត្តកំពង់ឆ្នាំង។ ប៉ុន្តែមិនដឹងថា ដំណើរការដែលអាចយកកំប្លោកមកផលិតចេញជាមេតាណុល និងស្រាកំប្លោកនេះបាននៅពេលណានោះទេ។

ប្រជាពលរដ្ឋរស់នៅតាមខ្នងព្រែកតូចៗតាមដៃទន្លេបានបញ្ជាក់ឲ្យដឹងផងដែរថា នៅរដូវទឹកឡើងនេះតាមព្រែកតូចៗកំប្លោកបានហូរចូលព្រែកយ៉ាងក្រាសគឺអ្នកមានកាណូតតូចៗមិនអាចបើកបរបានឡើយ។

ដោយត្រូវរង់ចាំពេលមានខ្យល់បោកបក់កំប្លោកអណ្តែតចេញទៅទន្លេទើបអាចបើកកាណូតតូចៗចេញចូលបាន។ ហើយទាល់តែទឹកទន្លេឡើងខ្ពស់លិចខ្នងកោះ ទើបកំប្លោកទាំងអស់នេះអណ្ដែតចេញទៅតាមវាលធំៗដែលទឹកលិច​ នេះគឺជាផលលំបាករបស់ប្រជាពលរដ្ឋរស់នៅតាមដងទន្លេ៕

អត្ថបទ៖ ឈៀង ថារិទ្ធ