អ្នកដាំត្រកួនចិនស្រុកសំរោងទង អះអាងថា មានទីផ្សារខ្ពស់ និងតម្លៃល្អ

ភ្នំពេញ៖ កសិករដាំបន្លែនៅភូមិស្រែផ្ស ឃុំក្រាំងអំពិល ស្រុកសំរោងទងខេត្តកំពង់ស្ពឺបានឲ្យកម្ពុជាថ្មីដឹងថា ត្រកួនចិនដែលពួកគាត់កំពុងដាំគឺលក់បានថ្លៃជាងរាល់ឆ្នាំ។

កសិករ ឆេម ចេវ បានឲ្យដឹងថា ត្រកួនចិនដែលដាំក្នុងចម្ការទំហំកន្លះហិកតា គឺឈ្មួញចុះមកទិញដល់ចម្ការ ក្នុង១គីឡូក្រាមបានថ្លៃ១៥០០រៀលខុសប្លែករាល់ឆ្នាំបានត្រឹម១០០០រៀលប៉ុណ្ណោះ។

កសិករដដែលបានឲ្យដឹងទៀតថា ដំណាំត្រកួនចិនរបស់គាត់គឺប្រើជីធម្មជាតិសុទ្ធសាធ គឺជីលាមកន៍គោលាយ ជាមួយដើមកន្រ្ទៀងខែត។ ហើយពេលវេលាដែលចាប់ផ្តើមដាំរហូតបានដកយកទៅលក់គឺមានរយៈពេល២០ថ្ងៃ។

ដោយឡែកឈ្មួញនាំយកពីចម្ការទៅលក់នៅផ្សារដើមគរ រាជធានៅភ្នំពេញ អ្នកស្រី វិន សុខា បានឲ្យកម្ពុជាថ្មីដឹងថា អ្នកស្រី បានប្រមូលទិញបន្លែត្រកួនចិនពីភូមិស្រែផ្ស ឃុំក្រាំងអំពិល ស្រុកសំរោងទង ខេត្តកំពង់ស្ពឺ ក្នុង១សប្តាហ៍៣ដង ដោយក្នុង១ដងបានពី៥០០គីឡូក្រាមទៅ៧០០គីឡូក្រាម។ ក្នុង១គីឡូក្រាមទិញពីចំការថ្លៃ១៥០០រៀល មកដល់ភ្នំពេញ បានថ្លៃ២០០០រៀល។ ចំណែកអ្នកលក់រាយបានថ្លៃ៣៥០០រៀលទៅ៤០០០រៀល។ អ្នកស្រី បានបន្ថែមថា «បន្លែក្នុងស្រុករបស់យើងបានថ្លៃជាងរាល់ឆ្នាំ ព្រោះកសិករ មិនដាក់ជីគីមីដូចបន្លែនាំចូលពីប្រទេសជិតខាងដែលប៉ះពាល់សុខភាពដល់អ្នកទទួលទាននោះទេ៕

អត្ថបទ ៖ នរា