ទីបំផុត គណបក្សភឿថៃ យល់ព្រមឲ្យ ចលនាឆ្ពោះទៅមុខ កាន់កាប់តំណែងប្រធានសភា តែមានលក្ខខណ្ឌ

គណបក្សភឿថៃ បានយល់ព្រមឲ្យគណបក្សចលនាឆ្ពោះទៅមុខ កាន់កាប់តំណែងប្រធានសភា ប៉ុន្តែក្នុងលក្ខខណ្ឌគណបក្សមួយនេះក៏នឹងទទួលបានតំណែងអនុប្រធានសភាចំនួន ២ រូបផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានគណបក្សភឿថៃ លោក Phumtham Wechayachai និយាយថា ក្នុងនាមជាគណបក្សជាប់លេខ២, ភឿថៃ យល់ព្រមអនុញ្ញាតឲ្យគណបក្សឈ្នះឆ្នោតគឺ ចលនាឆ្ពោះទៅមុខ កាន់តំណែងប្រធានសភា ក្នុងគោលបំណងបញ្ចប់ភាពជាប់គាំងរវាងគណបក្សទាំងពីរ។

គណបក្សទាំងពីរ មានជម្លោះជាមួយគ្នាលើតំណែងនេះ ដោយពីមុនគណបក្សភឿថៃអះអាងថា បើគណបក្សចលនាឆ្ពោះទៅមុខ សម្រេចចិត្តជ្រើសរើសជាអ្នកដឹកនាំស្ថាប័នប្រតិបត្តិរបស់រដ្ឋាភិបាល នោះគណបក្សភឿថៃ​ គួរតែត្រូវបានអនុញ្ញាតឲ្យធ្វើជាប្រធានសភា។

ទោះបីជាយ៉ាងណាក៏ដោយ ពេលនេះ លោក Phumtham និយាយថា ប្រសិនបើចលនាឆ្ពោះទៅមុខ ទទួលបានទាំងតំណែងនាយករដ្ឋមន្ត្រី និងប្រធានសភានោះ ភឿថៃ គួរតែទទួលបានតំណែងអនុប្រធានសភា ចំនួន ២ រូបផងដែរ ។

ប៉ុន្តែលោកគូសបញ្ជាក់ថា កិច្ចពិភាក្សាបន្ថែមទៀត លើការបែងចែកតួនាទីសំខាន់ៗ គួរតែផ្អាកសិន​ រហូតដល់គណៈកម្មាធិការរៀបចំការបោះឆ្នោត បញ្ចប់ការជ្រើសរើសសមាជិកសភា។

គួរបញ្ជាក់ថា យ៉ាងហោចណាស់ ៩៥ ភាគរយនៃសមាជិកសភាដែលជាប់ឆ្នោតចំនួន ៥០០ រូប ត្រូវតែទទួលបានការអនុម័តដោយគណៈកម្មាធិការរៀបចំការបោះឆ្នោត មុនពេលសភា អាចកោះប្រជុំលើកដំបូងរបស់ខ្លួន ដើម្បីជ្រើសរើសប្រធានសភា ខណៈសភា​ត្រូវ​បាន​គេ​រំពឹង​ថា ​នឹងកោះ​ប្រជុំ​ ហើយ​ជ្រើសរើស​នាយក​រដ្ឋមន្ត្រី​បន្ទាប់ ​មុន​ថ្ងៃ​ទី៣ ខែ​សីហា ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ បញ្ជាឲ្យរាប់សន្លឹកឆ្នោតឡើងវិញ នៅការិយាល័យខ្លះ