សម្ដេចតេជោ ហ៊ុន សែន ៖ ក្រុងអរិយក្សត្រ នឹងមិនកាត់ចូលរាជធានីភ្នំពេញ​​នោះទេ  

សម្ដេចតេជោ ហ៊ុន សែន​ នាយករដ្ឋមន្ត្រីនៃកម្ពុជា គូសបញ្ជាក់ថា ក្រុងអរិយក្សត្រ នឹងមិនកាត់ចូលរាជធានីភ្នំពេញ​​នោះទេ ដោយត្រូវស្ថិតនៅក្រោមការគ្រប់គ្រងរបស់រដ្ឋបាលខេត្តកណ្ដាល។

ការគូសបញ្ជាក់របស់សម្ដេចតេជោ ហ៊ុន សែ​ន ខាងលើនេះ បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រប្រព្រឹត្តកម្មទឹកស្អាតបាក់ខែង ស្ថិតនៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ នាព្រឹកថ្ងៃទី ១៩ ខែមិថុនា​ ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងឲ្យដឹងថា កាលពីមុនតំបន់បាក់ខែង ស្ថិតនៅក្នុងខេត្តកណ្ដាល តែក្រោយមកបានកាត់ចូលរាជធានីភ្នំពេញ តែក្រុងអរិយក្សត្រ នឹងមិនកាត់ចូលរាជធានីភ្នំពេញទៀតទេ។

សម្ដេចតេជោ ហ៊ុន សែន ថ្លែងបែបនេះថា «កន្លែងនេះ ពីដើមដីខេត្តកណ្ដាលទេ ដីខេត្តកណ្ដាលនៅឯគល់ស្ពានជ្រោយចង្វារណោះ ខ្ញុំកាត់មិនដឹងប៉ុន្មានដងហើយ អានេះកាត់ចុងក្រោយគេនៅតំបន់នេះ កាត់ចុងក្រោយគេ ដើម្បីដាក់ទៅក្នុងតំបន់រដ្ឋបាលក្រុងភ្នំពេញ ប៉ុន្តែឥឡូវសូមបញ្ជាក់ក្រុងអរិយក្សត្រ អត់មានឲ្យភ្នំពេញទេ​ បង្កើតក្រុងមួយឲ្យខាងខេត្តកណ្ដាលគេមានគេហៅថា ពន្ធលើអចលនទ្រព្យ នៅខាងខេត្តកណ្ដាលផង»។

តែយ៉ាងណាក៏ដោយ សម្ដេចតេជោ ហ៊ុន សែន បានបង្ហើបថា កាលពីពេលមុន មានអ្នកផ្ដល់យោបល់ថា បង្កើតក្រុងអរិយក្សត្រ ហើយកាត់ចូលរួមរាជធានីភ្នំពេញ តែត្រូវបានសម្ដេចបដិសេធ៕