បើបាត់បណ្ណសម្គាល់រថយន្ត អាចស្នើសុំថ្មីវិញបានទេ?

បើសិនជាបាត់បណ្ណសម្គាល់រថយន្ត(សម្រាប់រូបវន្តបុគ្គលសញ្ជាតិខ្មែរ) អាចស្នើសុំថ្មីបាន ដោយគ្រាន់តែតម្រូវឱ្យភ្ជាប់នូវ ឯកសារមួយចំនួន និងបង់កម្រៃសេវា ៣៦.០០០ រៀល សម្រាប់បណ្ណសម្គាល់ (លេខរាជធានី-ខេត្ត) និង ៦០.០០០ រៀល សម្រាប់បណ្ណសម្គាល់ (លេខពិសេសផ្ទាល់ខ្លួន)។ នេះបើតាមការផ្សព្វផ្សាយរបស់ ក្រសួងសាធារណការ និងដឹកជញ្ជូន នៅរសៀលថ្ងៃទី២០ ខែមិថុនា ឆ្នាំ២០២៣ នេះ។

ក្រសួងសាធារណការ បញ្ជាក់ថា នៅពេលដែលបងប្អូនប្រជាពលរដ្ឋ មកស្នើសុំធ្វើបណ្ណសម្គាល់រថយន្តជាថ្មី ឡើងវិញនោះ(ទុតិយតា) គឺត្រូវ​ភ្ជាប់នូវឯកសារចាំបាច់មួយចំនួនខាងក្រោមនេះ៖

• អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)
• ពាក្យសុំទុតិយតាបណ្ណសម្គាល់យានជំនិះ (មានបិទលេខតួ-ម៉ាស៊ីន កាល់ជាក់ស្ដែង)
• ពាក្យបណ្តឹងមានបញ្ជាក់ពីប៉ុស្ដិ៍នគរបាលរដ្ឋបាល
• វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ(ឆៀក)

សម្រាប់ព័ត៌មានលម្អិត ពីការធ្វើឡើងវិញនូវបណ្ណសម្គាល់រថយន្ត(សម្រាប់រូបវន្តបុគ្គលសញ្ជាតិខ្មែរ) ដែលបានបាត់
គឺ​អាច​ទាក់ទង​ទៅកាន់ Hotline 1275 របស់ក្រសួងសាធារណការ និងដឹកជញ្ជូនបាន៕