មន្ត្រីការទូតកម្ពុជាថ្លែងបទអន្តរាគមន៍៣ចំណុចក្នុងកិច្ចពិភាក្សាក្រៅផ្លូវការស្តីពីវិបត្តិនៅភូមា

មន្ត្រីជាន់ខ្ពស់ក្រសួងការបរទេសកម្ពុជា លោក គង់ ភោគ បានថ្លែងបទអន្តរាគមន៍ចំនួន៣ចំណុចសម្រាប់កិច្ចពិភាក្សាក្រៅផ្លូវការនៅប្រទេសថៃ ទាក់ទងនឹងវិបត្តិនៅមីយ៉ាន់ម៉ា។

បើតាមការឱ្យដឹងរបស់លោក អាន សុខខឿន អ្នកនាំពាក្យក្រសួងការបរទេសកម្ពុជា ក្នុងឱកាសចូលរួមកិច្ចពិភាក្សាក្រៅផ្លូវការ ស្តីពីបញ្ហាមីយ៉ាន់ម៉ា នៅប្រទេសថៃ កាលពីថ្ងៃទី១៨-១៩ ខែមិថុនា ឆ្នាំ២០២៣ លោក គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនៃកម្ពុជា និងជាតំណាងរបស់លោក ប្រាក់ សុខុន បានចូលរួមថ្លែងបទអន្តរាគមន៍សំខាន់ៗចំនួន៣ចំណុច។

ក្នុងបទអន្តរាគមន៍នេះ លោក គង់ ភោគ បានលើកឡើងថា ការចូលរួមរបស់ភាគីពាក់ព័ន្ធ រួមទាំងប្រទេសជាហត្ថលេខីនៃកិច្ចព្រមព្រៀងជាឯកច្ឆន្ទ ៥ចំណុចក្នុងកិច្ចពិភាក្សាក្រៅផ្លូវការនេះ គឺជាគន្លឹះនៃវិធានការកសាងទំនុកចិត្ត។

លោក បន្តថា ការផ្លាស់ប្តូរយោបល់ក្នុងវេទិកានេះទៀតសោតបានរួមចំណែកបង្កើតជាលម្ហការទូតសម្រាប់ភាគីពាក់ព័ន្ធ ដើម្បីចាប់ផ្តើមកិច្ចសន្ទនា សំដៅឆ្ពោះទៅរកដំណោះស្រាយនយោបាយ ដែលត្រូវដឹកនាំដោយ និងជាកម្មសិទ្ធិរបស់មីយ៉ាន់ម៉ា។

ទន្ទឹមនេះ លោក គង់ ភោគ បានសង្កត់ធ្ងន់ថា កិច្ចពិភាក្សាក្រៅផ្លូវការនេះ ក៏បានឆ្លុះបញ្ចាំងអំពីការអនុវត្តនូវការវាយតម្លៃ និងសេចក្តីសម្រេចចិត្ត ១៥ចំណុចរបស់ថ្នាក់ដឹកនាំអាស៊ាន ស្តីពីការអនុវត្តកិច្ចព្រមព្រៀងជាឯកច្ឆន្ទ ៥ចំណុច ដែលបានអនុម័តនៅក្នុងកិច្ចប្រជុំកំពូលអាស៊ានលើកទី៤០ និង៤១ នៅរាជធានីភ្នំពេញ កាលពីខែវិច្ឆិកា ឆ្នាំ២០២២ ដើម្បីជំរុញបន្ថែមទៀតក្នុងការអនុវត្តកិច្ចព្រមព្រៀងជាឯកច្ឆន្ទ ៥ចំណុច។

មន្ត្រីការទូតកម្ពុជារូបនេះ បានបន្ថែមថា ចំណុចទី១៤ នៃការវាយតម្លៃ និងសេចក្តីសម្រេចចិត្តខាងលើ បានចែងពីការស្វែងរកវិធីសាស្ត្រផ្សេងៗ សំដៅចូលរួមបំពេញបន្ថែម ឬជំរុញឱ្យមានការអនុវត្តដោយពេញលេញ ប្រកបដោយប្រសិទ្ធភាព និងឆាប់រហ័សនូវកិច្ចព្រមព្រៀងជាឯកច្ឆន្ទ ៥ចំណុច៕