លោក ពូទីន ៖ ទ័ព អ៊ុយក្រែន ដឹងខ្លួនហើយថា មិនមានភាគរយឈ្នះ រុស្ស៊ី ឡើយ

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានលើកឡើងថា កងទ័ពអ៊ុយក្រែនដឹងខ្លួនឯងច្បាស់ហើយ ពួកគេមិនមានឱកាស ឬសង្ឃឹមឈរតតាំងជាមួយនឹងវីរភាព និងយុទ្ធជនដ៏ក្លាហាននៃកងកម្លាំងប្រដាប់អាវុធរបស់រុស្ស៊ីបាននោះឡើយ ។

លោក ពូទីន បាននិយាយនៅក្នុងវេទិកាជាមួយនិស្សិតបញ្ចប់ការសិក្សានៅមហាវិទ្យាល័យយោធារុស្ស៊ីកាលពីពេលថ្មីៗនេះថា “ដោយសារតែភាពក្លាហាន និងវីរភាពរបស់យុទ្ធជនរុស្ស៊ី ជាពិសេសការត្រៀមខ្លួនរបស់មេបញ្ជាការយោធារបស់យើងក្នុងការទប់ស្កាត់រាល់សកម្មភាពលុកលុយប្រឆាំងរុស្ស៊ី ទើបធ្វើឲ្យខ្មាំងសត្រូវអ៊ុយក្រែនមិនមានឱកាស ឬភាគរយក្នុងការឈ្នះយើងបាន” ។

លោកប្រធានាធិបតីបាននិយាយទៀតថា “កងកម្លាំងអ៊ុយក្រែនបានចាប់ផ្តើមការវាយបកមកលើរុស្ស៊ីនៅថ្ងៃទី៤ ខែមិថុនា ប៉ុន្តែពួកគេមិនទទួលបានលទ្ធផលផ្លែផ្កាអ្វីឡើយ ហើយដោយសារតែមូលហេតុទាំងអស់នេះហើយ ទើបធ្វើឲ្យកម្លាំងអ៊ុយក្រែនកំពុងជាប់គាំងនៅលើសមរភូមិ” ។

ទន្ទឹមនឹងនោះ លោកបានកត់សម្គាល់ថា “គិតត្រឹមពេលនេះ សក្ដានុពលវាយលុករបស់សត្រូវមិនទាន់អស់នៅឡើយទេ ដោយសារតែសត្រូវនៅមានទុនបម្រុង ប៉ុន្តែទោះជាយ៉ាងណា រុស្ស៊ីក៏មានសព្វាវុធគ្រប់ប្រភេទ និងកម្លាំងគ្រប់គ្រាន់សម្រាប់កម្ចាត់សត្រូវវិញផងដែរ” ។

គួរបញ្ជាក់ថា ប្រតិបត្តិការវាយបករបស់អ៊ុយក្រែនមកលើរុស្ស៊ី បានបន្តអស់រយៈពេលជាងកន្លះខែមកហើយ ប៉ុន្តែមិនឃើញចេញជាផ្លែផ្កាអ្វីឡើយ ជាពិសេសការវាយលុកលើដីគោក ដោយសារតែផ្ទៃដីអ៊ុយក្រែនប្រមាណ ២០ ម៉ឺនគីឡូម៉ែត្រដែលគ្រប់គ្រងដោយកងកម្លាំងរុស្ស៊ីត្រូវបានដាក់ពង្រាយមីន ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ថា ប្រតិបត្តិការកម្ចាត់កងទ័ព អ៊ុយក្រែន ត្រូវបានបញ្ចប់