ពេជ្រ ប៊ុនសិទ្ធ បង្កើត​កំណត់ត្រាមិនចាញ់សោះ​​ក្នុងការឈ្នះខ្សែក្រវាតលើកដំបូង

អ្នក​លេង​គុន​ខ្មែរ ពេជ្រ ប៊ុនសិទ្ធ បាន​ក្លាយជាម្ចាស់​ខ្សែ​ក្រវាត់​ខារ៉ាបាវ រដូវ​កាល​ឆ្នាំ​២០២៣​នេះ​​ ក្រោយផ្ដួលកីឡាករថៃ ផេតផាកភូមិ នៅវគ្គផ្ដាច់ព្រ័ត្រ នាយប់ថ្ងៃ​អាទិត្យ ទី​២៥ ខែ​មិថុនា ឆ្នាំ​២០២៣​ នៅ​សង្វៀន​បាយ័ន​ស្ទឹង​មាន​ជ័យ។

សម្រាប់​ការ​ប្រកួត​ខ្សែ​ក្រវាត់​នេះ កូន​សិស្ស​លោក​គ្រូ ពេជ្រ សុផាន់ ធ្វើ​បាន​ល្អ​ឥត​ខ្ចោះ​ចាប់​ពី​​វគ្គ​សន្សំ​ពិន្ទុ​ក្នុង​ពូល​រហូត​ដល់​វគ្គ​ផ្តាច់​ព្រ័ត្រ។ នៅ​វគ្គ​សន្សំ​ពិន្ទុ​ក្នុង​៤​ប្រកួតគឺ​ប្រកួត​ទី១​ ពេជ្រ ប៊ុនសិទ្ធ បាន​ឈ្នះ​កីឡាករ  ស៊ែងតៈវ៉ាន់ ឆ.ហាផាយ៉ាក់ ដោយ​ពិន្ទុ, ប្រកួត​ទី​២ ផ្តួល​កីឡាករ​ថៃ ថៈឡេកងើន ​ក្នុង​ទឹកទី២, ប្រកួត​ទី​៣ ផ្តួល​កីឡាករ​ថៃ ឡាហ្វាន់ ក្នុង​ទឹក​ទី៣ និង​ប្រកួត​ទី​៤​​ផ្តួល​កីឡាករ​ថៃ ផេតផាកភូមិ ​ក្នុង​ទឹក​ទី១។

នៅ​​វគ្គ​ពាក់​កណ្តាល​ផ្តាច់​ព្រ័ត្រ ពេជ្រ ប៊ុនសិទ្ធ បាន​យក​ឈ្នះមិត្ត​រួម​ជាតិ ធន់ ផានិត ដោយ​ពិន្ទុ​ ប៉ុន្តែ​ស្ទើរ​តែ​ផ្តួល​ឲ្យ​សន្លប់​ទៅ​ហើយ​ចុង​ទឹក​ទី​៥ តែ​ចប់​ទឹក​ទាន់។ នៅ​វគ្គ​ផ្តាច់​ព្រ័ត្រ រូប​គេនៅ​តែ​ធ្វើ​បាន​ល្អ​ទៀត​ដោយ ផ្តួល​កីឡាករ​​ថៃ ផេត​ផាកភូមិ ឲ្យ​សន្លប់​ក្នុង​ទឹក​ទី​៣ ដើម្បី​ក្លាយ​ជា​ម្ចាស់​ខ្សែ​ក្រវាត់​ជា​មួយ​ប្រាក់​រង្វាន់​៦​ពាន់​ដុល្លារ​អាមេរិក។

នេះ​ជា​កំណត់​ត្រា​ថ្មី​ផ្ទាល់​ខ្លួន​របស់ ពេជ្រ ប៊ុនសិទ្ធ ដែល​បាន​ឈ្នះ​ខ្សែ​ក្រវាត់​សំខាន់​ជា​លើក​ដំបូង និង​មិន​ស្គាល់​បរាជ័យ​សោះ​សម្រាប់​ការ​​ប្រកួត​នេះ។

ពេជ្រ ប៊ុនសិទ្ធ បានប្រាប់កម្ពុជាថ្មីថា ​៖«តាំង​ពីវគ្គសន្សំពិន្ទុរហូតដល់វគ្គផ្ដាច់ព្រ័ត្រនេះ កីឡាករ២នាក់​ដែលខ្ញុំពិបាក​តទល់​គឺ កីឡាករថៃ ស៊ែងតៈវ៉ាន់ ឆ.ហាផាយ៉ាក់ និង ធន់ ផានិត ដោយខ្ញុំឈ្នះពួកគេដោយពិន្ទុ។ ពីកីឡាករ២រូបនេះគឺខ្ញុំផ្ដួលដៃគូ​ឲ្យបោះបង់ការប្រកួតទាំងអស់»។

សម្រាប់ការប្រកួតវគ្គផ្ដាច់ព្រ័ត្រ​ដំរីយោលដៃ ពេជ្រ ប៊ុនសិទ្ធ នៅតែធ្វើបានល្អនៅពេលប៉ះជាមួយកីឡាករថៃ ផេតផាកភូមិ ម្ដងទៀតក្រោយពីធ្លាប់ជូបគ្នាម្ដងហើយនៅវគ្គសន្សំពិន្ទុដោយផ្ដួលកីឡាករ​ថៃ​ឲ្យ​បោះ​បង់​ការ​ប្រកួត​ក្នុង​ទឹក​ទី១​តាម​រយៈ​ការ​ទាត់​ជើង​ក្រោម។

ទឹកទី១ ពួកគេគ្រាន់ស្ទាបស្ទង់សមត្ថភាពប៉ុណ្ណោះ ដោយ ផេតផាកភូមិ ព្យាយាមទាត់មិនឲ្យ ពេជ្រ ប៊ុនសិទ្ធ ចូល​ជិតឡើយ។ ទឹកទី២​ គ្រាន់តែចាប់ផ្ដើមភ្លាម ដំរីយោលដៃ​ក៏បើកការសម្រុកដោយប្រើកណ្ដាប់ដៃ និងទាត់ជើងក្រោមធ្វើឲ្យកីឡាករថៃ ផេតផាកភូមិ ពិបាកទប់ហើយព្យាយាមថយ។ ទឹកទី៣ អ្នក​លេង​គុន​ខ្មែរ​កាន់តែសម្រុកខ្លាំងជាងមុនដោយប្រើកណ្ដាប់ដៃ និងទាត់បំបែកកង់ តែ​ផេតផាកភូមិ ក៏ព្យាយាមទាត់ និងបោះជង្គង់ពីចម្ងាយ ប៉ុន្តែ​ហាក់គ្មានប្រសិទ្ធភាព។

ផេតផាកភូមិ ត្រូវ​បាន​អាជ្ញា​កណ្តាល​រាប់ ៨ ជាលើកទី១ ក្នុងទឹកទី៣ បន្ទាប់​ពី​ត្រូវ​កណ្ដាប់ដៃរបស់ ពេជ្រ ប៊ុនសិទ្ធ វ៉ៃចូលពោះទឹក។ ជិតបញ្ចប់ទឹកទី៣ទៅហើយ​កីឡាករ​កម្ពុជា​ វ៉ៃចូលពោះ​ធ្វើឲ្យ ផេតផាកភូមិ បោះបង់ការប្រកួតដោយអាជ្ញាកណ្ដាលរាប់ដល់១០ នៅ​តែ​មិន​អាច​ក្រោក​បាន។

ពេជ្រ ប៊ុនសិទ្ធ ​បាន​និយាយ​ថា​៖«ខ្ញុំមានអារម្មណ៏សប្បាយ និងរំភើបដែលបានឈ្នះខ្សែក្រវាត់លើកដំបូងជូនលោក ពេជ្រ សុផាន់»។

ក្រោយឈ្នះការប្រកួតនៅវគ្គផ្ដាច់ព្រ័ត្រនេះរូបគេ​ទទួល​បានខ្សែក្រវាត់១គ្រឿង ពានរង្វាន់១ និង ប្រាក់រង្វាន់ចំនួន៦​ពាន់​ដុល្លារ​អាមេរិក​។ ផេតផាកភូមិ បាន​លេខ​២ និង ធន់ ផានិត បាន​លេខ​៣៕

អត្ថបទ៖ ផា រតនា​