ប្រកួតក្នុងទ្រុងមិនហ៊ានធានាទេ តែបើធៀបលុយវិញ Mark Zuckerberg មិនឈ្នះ Elon Musk ឡើយ

រឿងរ៉ាវដែលកំពុងតែក្តៅគគុក និងទទួលការចាប់អារម្មណ៍យ៉ាងខ្លាំងពីសំណាក់មហាជននៅទូទាំងពិភពលោកនោះ គឺ​ការបបួលគ្នាប្រកួតក្នុងទ្រុងរវាងមហាសេដ្ឋីលំដាប់កំពូលចំនួន ២ រូប គឺលោក​មហាសេដ្ឋីចិត្តធំចង់ទៅរស់នៅភពអង្គារ​ Elon Musk ជាមួយមេក្រុមហ៊ុន Mata លោក Mark Zuckerberg ។

យោងតាមការបង្ហោះសារលើបណ្ដាញ Twitter នាពេលថ្មីៗនេះបានឲ្យដឹងថា លោកមហាសេដ្ឋីទាំងពីរមិនមែនឌឺដងគ្នាត្រឹមតែពាក្យសម្តីនោះឡើយ គឺបបួលគ្នាឡើងវាយក្នុងទ្រុងមែនទែនតែម្តង ហើយរឿងនេះក៏អាចកើតឡើងផងដែរ​ ប៉ុន្តែបើប្រៀបធៀបពីទ្រព្យសម្បត្តិគ្នាវិញ ប្រាកដណាស់គឺមិនអាចទៅរួចជាមួយមហាសេដ្ឋីគ្រាប់រ៉ុកកែត Elon Musk ឡើយ ។

ដូច្នេះ មកដឹងពីទ្រព្យសម្បត្តិរវាងមហាសេដ្ឋីទាំងពីរ៖

មហាសេដ្ឋីលំដាប់កំពូល​ Elon Musk រហ័សនាមហៅថា មហាសេដ្ឋីគ្រាប់រ៉ុកកែត មានទ្រព្យសម្បតិ្ត​ប្រមាណជាង ២៣៤ ពាន់លានដុល្លារអាមេរិក និងជាម្ចាស់ក្រុមហ៊ុនធំៗជាច្រើនដូចជា Tesla និង SpaceX រួមទាំងបណ្ដាញសង្គម Twitter ជាដើម ។ ក្រៅពីក្រុមហ៊ុនទាំងបីនេះ លោកនៅមានក្រុមហ៊ុនផ្សេងមួយចំនួនទៀតផងដែរ ។

បើទោះបីជាលោកទើបតែបរាជ័យក្នុងការបាញ់បង្ហោះយាន​ Starship ដ៏ធំបំផុត​នាពេលដើមឆ្នាំនេះក៏ដោយ ប៉ុន្តែ​លោកបានបញ្ជាក់ប្រាប់ថា នឹងបន្ថែមថវិការឲ្យដល់ ៣ ពាន់លានដុល្លារ​ ដើម្បីបាញ់បង្ហោះយាននេះឲ្យបានជោគជ័យ ។

ចំពោះជីវិតគ្រួសារវិញ ឈ្មោះជាមហាសេដ្ឋីមែន ប៉ុន្តែ Elon Musk គឺជាបុរសពោះម៉ាយប៉ុណ្ណោះ បន្ទាប់ពីបែកបាក់ជាមួយភរិយាចំនួន ៣ នាក់រួចមកហើយ ដោយនៅពេលនេះបុរសវ័យ ៥១ ឆ្នាំរូបមានកូនចំនួន ១០ នាក់ ។

ដោយឡែក មេក្រុមហ៊ុន Meta គឺលោកមហាសេដ្ឋី Mark Zuckerberg ដែលមានវ័យ ៣៩ ឆ្នាំ និងកូន ៣ នាក់ វិញ​​ គឺមានគម្លាតទ្រព្យសម្បតិ្តជាងពាក់កណ្តាលជាមួយ Elon​ Musk ។ យោងតាមការចុះផ្សាយពីទស្សនាវដ្ដី Forbs Billionaires បានឲ្យដឹងថា Mark Zuckerberg មានទ្រព្យសម្បត្តិត្រឹមតែ ១០២.៤ ពាន់លានដុល្លារប៉ុណ្ណោះ ដែលចំណូលទាំងនោះ រកបានមកពីបណ្ដាញសង្គម Facebook ។

គួរបញ្ជាក់ថា បើសិនជាការប្រកួតមួយនេះ ពិតជាកើតឡើងមែន​ នោះវានឹងក្លាយជាប្រវត្តិសាស្ត្រថ្មីមួយ​ដែលមហាសេដ្ឋីសល់លុយ​រាប់ពាន់លានដុល្លារចាយលែងអស់ ឡើងប្រកួតគ្នា ៕

ប្រែសម្រួល ៖ នាង រតនៈ

ប្រភព ៖ Forbe

ចុចអាន ៖ តើការបះបោរប្រដាប់អាវុធនៅ រុស្ស៊ី ជាសេណារីយ៉ូរៀបចំឡើងដោយលោក ពូទីន ឬយ៉ាងណា?