ខេត្តភាគខាងជើងប្រទេសថៃ រងគ្រោះដោយការរញ្ជួយដី ផ្ទួនៗ

យោងតាមនាយកដ្ឋានឧតុនិយមថៃ បានឲ្យដឹងថា គ្រោះរញ្ជួយដីកម្រិត ៥.០រ៉ិចទ័រ ដែលបានវាយប្រហារប្រទេសមីយ៉ាន់ម៉ា កាលពីយប់ថ្ងៃសុក្រទី៣០ខែមិថុនា បានធ្វើឲ្យរង្គើដល់ស្រុកមួយចំនួនក្នុងខេត្ត Chiang Rai និងតំបន់នៅជាប់ៗនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរអង្កេតការរញ្ជួយដីរបស់នាយកដ្ឋាននេះ បានរាយការណ៍ថា ការរញ្ជួយដី បានកើតឡើងនៅម៉ោង១១:៤៦នាទីយប់ថ្ងៃសុក្រទី៣០ខែមិថុនា ក្នុងប្រទេសមីយ៉ាន់ម៉ា មានចម្ងាយប្រហែល ១០០គីឡូម៉ែត្រពីស្រុក Mae Sai នៃខេត្ត Chiang Rai នៃប្រទេសថៃ។

ប្រជាពលរដ្ឋក្នុងស្រុក Mae Sai, Mae Chan និង Muang នៃខេត្តភាគខាងជើងមួយនេះ និងតំបន់ក្បែរៗនោះ សុទ្ធតែបានរាយការណ៍អំពីការរង្គើ។ អ្នកស្ថិត​នៅ​ក្នុង​អគារ​ខ្ពស់ៗ​មួយ​ចំនួន ​ក៏​បាន​កត់​សម្គាល់​ឃើញថា ​អគារ​របស់​ពួក​គេ​ញ័រ​ដែរ។

ទាក់ទិននឹងបញ្ហានេះ អាជ្ញាធរមូលដ្ឋាន បានបញ្ជូនមន្ត្រីទៅវាយតម្លៃការខូចខាត នៅតាមតំបន់របស់ពួកគេ។ យ៉ាងណាក្តី មិន​មាន​របាយ​ការណ៍អំ​ពីមនុស្ស​ស្លាប់​និង​របួស​ទេ។

គួរបញ្ជាក់ថា ថ្វីបើការរញ្ជួយនេះ មានចំណុចកណ្តាលនៅក្នុងប្រទេសមីយ៉ាន់ម៉ាក៏ដោយ ប៉ុន្តែវាបានធ្វើឲ្យរង្គើដល់ប្រទេសថៃ ហើយខេត្តភាគខាងជើងចំនួន៦ បានរងគ្រោះរួចទៅហើយ ដោយសារតែការរញ្ជួយកាលពីថ្ងៃព្រហស្បតិ៍ទី២៩ខែមិថុនា៕

ប្រែសម្រួល៖ Vann Vann

ប្រភព៖ Bangkok Post  

ចុចអាន​៖ ថៃ ជួបគ្រោះរញ្ជួយដី រង្គើ ៦ខេត្ត