​​ផ្អាកសំណង់ដែលរងការរិះគន់ថាមានរូបរាងតូចចម្លែកនៅប្របប្រឡាយស្ទឹងមានជ័យ

សំណង់មួយកន្លែងស្ថិតនៅប្របប្រឡាយស្ទឹងមានជ័យ សង្កាត់មានស្ទឹងមានជ័យ រាជធានីភ្នំពេញ​ត្រូវ​បានអាជ្ញាធរផ្អាកការសាងសង់​ជាបណ្ដោះអាសន្ន បន្ទាប់ពីមានការរិះគន់ពីអ្នក​លេងបណ្ដាញ​សង្គម​ហ្វេសប៊ុកថា សំណង់នេះ មានរូបរាងតូចចម្លែកហើយបារម្ភប្រឈមបញ្ហាគ្រោះថ្នាក់។

ឆ្លើយតបនឹងការរិះគន់ ម្ចាស់ផ្ទះបានពន្យល់វិញថា ដីខ្លួនត្រូវបានបរិច្ចាគជូនគម្រោងអភិវឌ្ឍន៍ប្រឡាយស្ទឹងមានជ័យ ហើយដី នៅសល់ម្ចាស់សាងសង់លំនៅឋានសម្រាប់រស់នៅសមរម្យ។

យោងតាមការបំភ្លឺរបស់សាលាសង្កាត់ស្ទឹងមានជ័យ ដោយបានស្រង់សម្តីពីម្ចាស់ផ្ទះបានគូសបញ្ជាក់ថា កាលពីមានគំរោងអភិវឌ្ឍន៍ប្រឡាយស្ទឹងមានជ័យ ម្ចាស់ដីបានបរិច្ចាគដីជូនគំរោងអភិវឌ្ឍន៍ប្រឡាយ ដីដែលនៅសល់ម្ចាស់សាងសង់លំនៅដ្ឋានសម្រាប់រស់នៅសមរម្យ ដោយមានទំហំ ក្រោយ ៤ម៉ែត្រ×១២ម៉ែត្រ សហគមន៍ប្រឡាយស្ទឹងមានជ័យ រាល់លំនៅដ្ឋាន នឹងការតភ្ជាប់ប្រព័ន្ធទឹក ភ្លើង ត្រូវបានរដ្ឋភ្ជាប់ឱ្យដោយមិនគិតថ្លៃ។

លោក ជា សារ៉េត ចៅសង្កាត់ស្ទឹងមានជ័យ ប្រាប់កម្ពុជាថ្មីនៅរសៀលថ្ងៃទី ០៣ ខែកក្កដា ឆ្នាំ ២០២៣នេះថា ដើមឡើយទីតាំងដីនេះគឺជាដីស្ទឹង ហើយបន្ទាប់ពីការអភិវឌ្ឍហើយដីត្រង់ចំណុចនោះគឺរបស់ម្ចាស់ដីដែលសល់ហើយគាត់ក៏សង់ផ្ទះ។ ប៉ុន្តែលោកថា រូបថតតែមួយជ្រុងមើលទៅឃើញតូច ជាក់ស្ដែងម្ខាងទៀតធំ គឺរាងច្រមុះជ្រូក មិនតូចដូចរូបនោះទេ។

លោកចៅសង្កាត់បានឱ្យដឹងទៀតថា មន្ត្រីជំនាញការិយាល័យភូមិបាលចុះទៅត្រួតពិនិត្យធ្វើកំណត់ហេតុ ដោយផ្អាកការសាងសង់បណ្ដោះអាសន្នដើម្បីរង់ចាំការសម្របសម្រួលពីអ្នកបច្ចេកទេស៕