ចលនាឆ្ពោះទៅមុខ និងភឿថៃ ឈ្លោះគ្នារាប់ខែរឿងប្រធានសភា ចុងក្រោយតំណែងនេះ បានទៅបក្សផ្សេង

គណបក្សចលនាឆ្ពោះទៅមុខ និងគណបក្សភឿថៃ បានព្រមព្រៀងគ្នាឲ្យមេដឹកនាំគណបក្ស ប្រាឆាឆាត លោក Wan Muhammad Nor Matha ធ្វើជាប្រធានសភា ដោយគណបក្សចលនាឆ្ពោះទៅមុខ និងភឿថៃ នឹងទទួលបានកៅអីអនុប្រធានសភាម្នាក់មួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំគណបក្សចលនាឆ្ពោះទៅមុខ លោក Pita Limjaroenrat បានប្រាប់សន្និសីទសារព័ត៌មានមួយកាលពីយប់ថ្ងៃចន្ទទី៣ខែកក្កដាថា ភាគីទាំងពីរ បានឯកភាពគ្នាឲ្យលោក Wan Muhammad Nor ធ្វើជាប្រធានសភា ខណៈគណបក្សចលនាឆ្ពោះទៅមុខ នឹងកាន់តំណែង​អនុប្រធាន​សភាទី​មួយ ចំណែក​បក្ស​ភឿ​ថៃ​ ជា​អនុប្រធាន​ទី​ពីរ។

លោក​​បន្ត​ថា “សម្ព័ន្ធ​មិត្ត​ចម្រុះ​ចំនួន៦បក្សផ្សេង​ទៀត ​ក៏បាន​គាំទ្រ​ការ​សម្រេច​ចិត្ត​នេះផងដែរ ហើយកិច្ចព្រមព្រៀងនេះ គឺដើម្បីការរួបរួមគ្នាក្នុងចំណោមគណបក្សនយោបាយទាំង៨ ដែលបាននិងកំពុងខិតខំប្រឹងប្រែងអស់ពីសមត្ថភាព តែងតាំងខ្ញុំជានាយករដ្ឋមន្ត្រី” ។

លោក Pita ក៏បាននិយាយផងដែរថា គណបក្សចលនាឆ្ពោះទៅមុខ និងភឿថៃ នឹងធ្វើវិសោធនកម្មច្បាប់ លើកលែងទោសមនុស្សដែលត្រូវបានកាត់ទោសចំពោះការបញ្ចេញមតិនយោបាយ និងធ្វើកំណែទម្រង់ច្បាប់ទាក់ទងកងកម្លាំងប្រដាប់អាវុធ រួមទាំងច្បាប់អាជ្ញាសឹក និងសន្តិសុខផ្ទៃក្នុងផងដែរ។

ស្របពេលជាមួយគ្នានោះ មេដឹកនាំទី២នៃគណបក្សភឿថៃ លោក Phumtham Wechayachai និយាយថា លោកបានស្នើឲ្យលោក Wan Muhammad Nor ធ្វើជាប្រធានសភា ដោយសារតែមេដឹកនាំបក្សប្រាឆាឆាតរូបនេះ អព្យាក្រឹត ហើយសំណើនេះ គឺជាមធ្យោបាយឲ្យសម្ព័ន្ធមិត្ត បន្តការបង្កើតរដ្ឋាភិបាលរបស់ពួកគេ។

គួររម្លឹកឡើងវិញ គណបក្សចលនាឆ្ពោះទៅមុខនិងភឿថៃ បានឈ្លោះប្រកែកគ្នាក្រោយការបោះឆ្នោតសកល ពាក់ព័ន្ធរឿងតែងតាំងប្រធានសភា ដោយសារតែគណបក្សទាំង២ មិនដាច់ស្រេចគ្នាលើបេក្ខជនរៀងៗខ្លួន ខណៈកាលពីមុន គណបក្សចលនាឆ្ពោះទៅមុខ បានចុចឈ្មោះលោក Padipat Sunthiphada ធ្វើជាបេក្ខជនប្រធានសភារបស់ខ្លួន ខណៈគណបក្សភឿថៃ ចង់ឲ្យសមាជិកជើងចាស់របស់ខ្លួនគឺលោក Suchart Tancharoen មកកាន់តំណែងនេះ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ទីបំផុត គណបក្សភឿថៃ យល់ព្រមឲ្យ ចលនាឆ្ពោះទៅមុខ កាន់កាប់តំណែងប្រធានសភា តែមានលក្ខខណ្ឌ