តារាជើងចាស់អន្តរជាតិ ៤ ដួង មានកូនដោយមិនដឹងខ្លួន

ជីវិតបុគ្គលល្បីៗលើពិភពលោកពោរពេញទៅដោយភាពភ្ញាក់ផ្អើល និងគួរឲ្យចាប់អារម្មណ៍ ជាពិសេសរឿងទំនាក់ទំនងស្នេហា ។ ក្នុងទំនាក់ទំនងស្នេហានេះទៀតសោត តារាមួយចំនួនក៏មានរឿងអាស្រូវដែលឈានទៅដល់ការពពោះទាំងមិនដឹងខ្លួនផងដែរ ។

ខាងក្រោមនេះគឺជាតារាជើងចាស់អន្តរជាតិ ៤ ដួង ដែលមានស្នេហាលួចលាក់រហូតដល់មានកូនមិនដឹងខ្លួន៖

១. លោក Arnold Schwarzenegger

លោក Arnold គឺជាតារាសម្ដែងជនជាតិអាមេរិក-អូទ្រីស អ្នកជំនួញ អ្នកផលិតភាពយន្ត អ្នកនយោបាយ និងជាអ្នកលេងកាយវប្បកម្មអាជីព អាយុ ៧៥ ឆ្នាំ ។ កាលពីឆ្នាំ ១៩៩៧ លោក Arnold Schwarzenegger មានស្នេហាលួចលាក់ជាមួយអ្នកថែទាំផ្ទះប្រចាំគ្រួសារឈ្មោះ Mildred Patricia Baena ។ ក្រោយមកនាងបានផ្ដល់កំណើតដល់កូនប្រុសម្នាក់ឈ្មោះ Joseph ប៉ុន្តែ Arnold ស្មានថា ជាកូនរបស់អតីតប្ដីរបស់នាង Mildred ។ រហូតដល់ថ្ងៃមួយដែល Arnold ដឹងរឿង ទើបគាត់ចាប់ផ្ដើមទំនុកបម្រុងដល់ម្ដាយកូនទាំងពីរនាក់នេះ ចំណែកឯភរិយារបស់លោក គឺអ្នកស្រី Maria Shriver វិញក៏លែងលះគ្នាក្នុងឆ្នាំ ២០២១ ទៅ ។

២. លោក Chuck Norris

លោក Chuck Norris គឺជាសិល្បករក្បាច់គុន និងជាតារាសម្តែងជនជាតិអាមេរិកវ័យ ៨៣ ឆ្នាំ ។ អំឡុងឆ្នាំ ១៩៨០ លោក Chuck មានភរិយាឈ្មោះ Dianne Holchek ប៉ុន្តែគាត់បានក្បត់អ្នកស្រីទៅមានស្នេហាលួចលាក់ជាមួយស្ត្រីម្នាក់ឈ្មោះ Johanna ។ Johanna មិនដឹងថា Chuck មានភរិយាឡើយ រហូតដល់នាងបានពពោះកូនស្រីម្នាក់ឈ្មោះ Dina ។ ដល់ឆ្នាំ ១៩៩១ Dina បានសរសេរសំបុត្រជូនដំណឹងប្រាប់លោក Chuck ថា នាងជាកូនស្រីបង្កើតរបស់គាត់ ធ្វើឲ្យ Chuck សប្បាយចិត្តជាខ្លាំង ។

៣. លោក Clint Eastwood

Clint Eastwood គឺជាតារាសម្ដែង និងជាអ្នកដឹកនាំរឿងជនជាតិអាមេរិក ។ មុនរៀបការជាមួយប្រពន្ធដំបូងរបស់គាត់គឺអ្នកស្រី Maggie Johnson លោក Clint មានស្នេហាលួចលាក់នៅខាងក្រៅរហូតមានកូន ។ ស្ត្រីនោះមិនបានប្រាប់គាត់ពីកូនស្រីខ្លួនឈ្មោះ Laurie សោះឡើយ ថែមទាំងស្វែងរកអ្នកចិញ្ចឹមទៀតផង ។ ពេល Laurie ធំដឹងក្ដីទើបនាងស្វែងយល់ថា Clinton ជាឪពុក តាមរយៈការស្វែងរកឪពុកបង្ក្កើតរបស់នាង ។

៤. លោក Gavin Rossdale

លោក Gavin Rossdale គឺជាតន្ត្រីករជនជាតិអង់គ្លេស ដែលត្រូវបានគេស្គាល់ថាជាអ្នកចម្រៀង និងជាអ្នកលេងហ្គីតានៃក្រុមតន្ដ្រីរ៉ុក Bush មានអាយុ ៥៧ ឆ្នាំ ។ ក្នុងឆ្នាំ ២០០៤ កូនស្រីធម៌របស់លោក Gavin សង្ស័យថាគាត់ជាឪពុកបង្កើតរបស់នាង ព្រោះ Daisy មានឈាមប្រភេទ O ដែលម្ដាយឪពុកនាងគ្មាន ខណៈបច្ចុប្បន្ននេះអ្នកទាំងពីរមានទំនាក់ទំនងយ៉ាងស្អិតរមួត ៕

ប្រែសម្រួល៖ វារី

ប្រភព៖ Toofab

ចុចអាន៖ តារាអន្តរជាតិ ៦ ដួង ចែករំលែកបទពិសោធន៍ជំងឺថប់បារម្ភ