ក្រសួងទេសចរណ៍-វិស័យឯកជន នឹងបើកការប្រកួតឆុងកាហ្វេថ្នាក់ជាតិ ដើម្បីលើកកម្ពស់​វិស័យឧស្សាហកម្មកាហ្វេកម្ពុជា

ក្រសួងទេសចរណ៍ សហការជាមួយសមាគមភោជនីយដ្ឋាន និងក្រុមហ៊ុនខូហ្វី នឹងបើកការប្រកួតប្រជែង​ឆុងកាហ្វេថ្នាក់ជាតិប្រចាំឆ្នាំ ២០២៣ ដើម្បីស្វែងរកជើងឯងប្រចាំប្រទេស និងលើកកម្ពស់ឧស្សាហកម្មកាហ្វេកម្ពុជា។

តាមសេចក្តីជូនដំណឹងរបស់ក្រសួងទេសចរណ៍ នាពេលថ្មីៗនេះ បានប្រកាសដល់សាធារណជន ដែលមានជំនាញ​ឆុងកាហ្វេ ជាពិសេសយុវជនឱ្យចូលរួមក្នុងការប្រកួតប្រជែងនេះ។

សម្រាប់ការលក្ខខណ្ឌជ្រើសក្នុងការប្រកួតប្រជែងនេះ តម្រូវឱ្យបេក្ខជន បេក្ខនារីទាំងពីរភេទមានសញ្ញាតិខ្មែរ មានបទពិសោធន៍ និងចំណេះដឹងខាងផ្នែកកាហ្វេ និងជាបុគ្គលិក ឬម្ចាស់អាជីវកម្មហាងកាហ្វេ។

ចំពោះអត្ថប្រយោជន៍ដែលទទួលបានពីការប្រកួតនេះ គឺពានជើងឯកឆុងកាហ្វេថ្នាក់ជាតិ ទទួលបានចំណេះដឹង​ផ្នែកគណៈ​កម្មការ និងបទពិសោធន៍ពីបេក្ខជនចូលរួមប្រកួត ជាពិសេសនឹងបានធ្វើដំណើរទស្សនកិច្ចទៅ​ចូលរួម​ទស្សនាការប្រកួតឆុងកាហ្វេលំដាប់ថ្នាក់ពិភពលោកនៅប្រទេសកូរ៉េខាងត្បូងផងដែរ។

សម្រាប់បេក្ខជនដែលចូលរួមតម្រូវឱ្យបំពេញឈ្មោះរួចផ្ញើទៅក្រុមការងារអ្នករៀបចំកម្មវិធី និងត្រូវបង់វិភាគទានសម្រាប់​ការប្រកួត ១០ដុល្លារ ក្នុង១នាក់ សម្រាប់សមាជិកសមាគមភោជនីយដ្ឋានកម្ពុជា និង ២០ដុល្លារ សម្រាប់អ្នកដែល​មិនមែនជាសមាជិក។

បើតាមក្រសួងទេសចរណ៍ អ្នករៀបចំកម្មវិធី នឹងជូនដំណឹងពីការប្រកួតនេះ ដល់បេក្ខជនទាំងអស់ នៅពេលក្រោយ៕