ចិន ថា អាមេរិក កំពុងរុញតៃវ៉ាន់ ធ្លាក់ជ្រោះមហន្តរាយ

ក្រសួងការពារជាតិចិន នៅថ្ងៃពុធទី៥ខែកក្កដា បានចោទប្រកាន់សហរដ្ឋអាមេរិកថា មានចេតនាបង្កើនភាពតានតឹងនៅច្រកសមុទ្រតៃវ៉ាន់ បន្ទាប់ពីទីក្រុងវ៉ាស៊ីនតោន យល់ព្រមលក់កញ្ចប់យោធាតម្លៃ ៤៤០ លានដុល្លារ ទៅឲ្យទីក្រុងតៃប៉ិ កាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ចប់សព្វាវុធដែលរួមមានគ្រាប់កាំភ្លើង ៣០ មិល្លីម៉ែត្រ អាវុធធុនតូច ប្រព័ន្ធអាវុធប្រយុទ្ធ និងសម្ភារជំនួយផ្នែកដឹកជញ្ជូនផ្សេងទៀត ត្រូវបានអនុម័តកាលពីសប្តាហ៍មុនដោយក្រសួងការបរទេសសហរដ្ឋអាមេរិក ប៉ុន្តែនៅក្នុងសេចក្តីថ្លែងការណ៍មួយ អ្នកនាំពាក្យក្រសួងការពារជាតិចិនលោក Tan Kefei  បានចោទប្រកាន់ទីក្រុងវ៉ាស៊ីនតោនថា កំពុងជ្រៀតជ្រែក កិច្ចការផ្ទៃក្នុងរបស់ខ្លួនខ្លាំងឡើងៗ។

លោក Tan បាននិយាយថា “បញ្ហានេះគឺស្មើនឹងការប្រែក្លាយតៃវ៉ាន់ទៅជា “ធុងរំសេវ” និងរុញប្រជាជនតៃវ៉ាន់ ឲ្យធ្លាក់ចូលទៅក្នុងជ្រោះមហន្តរាយ”។

ស្របពេលជាមួយគ្នានោះ លោក Tan ក៏បានជំរុញឲ្យទីក្រុងវ៉ាស៊ីនតោន បញ្ឈប់ជាបន្ទាន់នូវការលក់អាវុធដល់តៃវ៉ាន់ និងបញ្ចប់រាល់ទម្រង់នៃការឃុបឃិតយោធារវាងសហរដ្ឋអាមេរិក និងតៃវ៉ាន់ផងដែរ។ លើសពីនេះ លោកបានព្រមានថា រាល់ការប៉ុនប៉ងប្រើកម្លាំង ដើម្បីស្វែងរកឯករាជ្យ គឺនឹងត្រូវវិនាស។

គួររម្លឹកឡើងវិញ កាលពីសប្តាហ៍មុន ក្រសួងការបរទេសសហរដ្ឋអាមេរិក បាននិយាយថា កិច្ចព្រមព្រៀងសព្វាវុធ នឹងជំរុញកិច្ចខិតខំប្រឹងប្រែងដើម្បីធ្វើទំនើបកម្មកងកម្លាំងប្រដាប់អាវុធរបស់កោះតៃវ៉ាន់ និងរក្សានូវសមត្ថភាពការពារដែលអាចទុកចិត្តបាន។

ទោះយ៉ាងណា ទីក្រុងវ៉ាស៊ីនតោន មិនទទួលស្គាល់ការទាមទារឯករាជ្យរបស់តៃវ៉ាន់នោះទេ ប៉ុន្តែបានរក្សាទំនាក់ទំនងការទូតក្រៅផ្លូវការ ខណៈច្បាប់របស់សហរដ្ឋអាមេរិកបានកំណត់ថា ខ្លួនត្រូវតែផ្តល់ឲ្យទីក្រុងតៃប៉ិនូវអាវុធលក្ខណៈការពារ ដើម្បីទប់ទល់នឹងការគំរាមកំហែងដែល អាចធ្វើឲ្យប៉ះពាល់ដល់សន្តិសុខរបស់ប្រជាជនតៃវ៉ាន់៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក សម្រេចលក់អាវុធឲ្យ តៃវ៉ាន់ ក្នុងទំហំទឹកប្រាក់ ៤៤០ លានដុល្លារ