ក្រុមហ៊ុន Warner Bros ឆ្លើយតបយ៉ាងខ្លីទៅវៀតណាម ពាក់ព័ន្ធផែនទីក្នុងរឿង Barbie

បន្ទាប់ពីវៀតណាមហាមចាក់បញ្ចាំងរឿង Barbie ដោយសារតែក្នុងសាច់រឿងបង្ហាញពីដែនដីដែលចិនអះអាងថាជារបស់ខ្លួន ពេលនេះភាគីក្រុមហ៊ុនស្ទូឌីយោ Warner Bros ក៏បានចេញមកឆ្លើយតបផងដែរ ។

ក្រុមហ៊ុន Warner Bros បកស្រាយយ៉ាងខ្លីថា “ផែនទីនៅក្នុងរឿង Barbie គឺជាគំនូរធម្មតាប៉ុណ្ណោះ ដើម្បីពណ៌នាអំពីដំណើររបស់ Barbie ទៅកាន់ពិភពពិត គ្មានបំណងអ្វីផ្សេងឡើយ” ។

ជាក់ស្ដែង Barbie មានកាលបរិច្ឆេទ​គ្រោង​ចាក់បញ្ចាំង​ក្នុង​ប្រទេស​វៀតណាម ​នៅ​ថ្ងៃ​ទី ២១ ខែ​កក្កដា ដូចសហរដ្ឋអាមេរិកដែរ ។ ប៉ុន្តែវៀតណាមសង្កេតឃើញខ្សែបន្ទាត់ ៩ ត្រេ រាងអក្សរ U លើផែនទីចិន ដែលបង្ហាញពីការទាមទារតំបន់ដ៏ធំនៃសមុទ្រចិនខាងត្បូង និងទឹកដីដែលវៀតណាមចាត់ទុកថាជារបស់ខ្លួន ទើបគេហាមឃាត់វិញ ។

ត្រឡប់មកលម្អិតពីរឿងវិញ Barbie គឺជាភាពយន្តដកស្រង់ពីតុក្កតាកូនក្រមុំដែលពេញនិយមបំផុតលើពិភពលោក ។ ចំពោះរឿងនេះ ក្រុមហ៊ុនស្ទូឌីយោ Warner Bros បានចំណាយប្រាក់ ១០០ លានដុល្លារក្នុងការផលិត និងដើរតួដោយតារាល្បីៗរួមមាន Margot Robbie និង Ryan Gosling ជាតួសំខាន់ៗ ។

សូមរំលឹកថា Barbie គឺជាភាពយន្តចុងក្រោយបង្អស់ដែលវៀតណាមហាមចាក់បញ្ចាំង ដោយសារមានឈុតឆាកផែនទីដែលចិនទាមទារដែនទឹកជាឯកតោភាគី នៅសមុទ្រចិនខាងត្បូង ខណៈកាលពីឆ្នាំ ២០២២ វៀតណាមក៏បានហាមចាក់បញ្ចាំងរឿង Unchartered របស់ក្រុមហ៊ុន Sony ផងដែរ ដោយសារហេតុផលដូចគ្នានេះ ៕

ប្រែសម្រួល៖ វារី

ប្រភព៖ TNP

ចុចអាន៖ ៦ យ៉ាង គួរឲ្យចាប់អារម្មណ៍ពីតួអង្គនៅក្នុងរឿង Barbie