បាក់រលំស្ពានអាកាសនៅកណ្ដាលទីក្រុងបាងកកស្លាប់និងរបួសច្រើននាក់

មធ្យោបាយធ្វើដំណើរ និងមនុស្សជាច្រើននាក់បានទទួលរងគ្រោះថ្នាក់យ៉ាងធ្ងន់ធ្ងរ បន្ទាប់ពីស្ពានអាកាសមួយកន្លែងដែលកំពុងកសាងនៅកណ្ដាលទីក្រុងបាងកកប្រទេសថៃ ត្រូវបានបាក់រលំទាំងមិនទាន់ដឹងមូលហេតុ ។

សំឡេងនៃការបាក់រលំស្ពានអាកាស បានលាន់ឮយ៉ាងកងរំពងដោយក្នុងនោះគេក៏បានឮសំឡេងមនុស្សស្រែកយ៉ាងតក់ស្លុតផងដែរ ខណ:ដែលស្ពានអាកាសប្រវែងប្រមាណជាង ១០០ ម៉ែត្រនៅចំណុចឡាតក្រាក់បាំង នៅកណ្តាលទីក្រុងបាងកក បានបាក់រលំកាលពីវេលាម៉ោង ៦ និង ១១ នាទី ល្ងាចថ្ងៃទី១០ ខែកក្កដា ឆ្នាំ២០២៣ ទាំងមិនទាន់ដឹងអំពីមូលហេតុនៅឡើយ ។

គួរបញ្ជាក់ថា ស្ពានអាកាសមួយខ្សែនេះ គឺគម្រោងសាងសង់ប្រវែង ២,២០០ ម៉ែត្រ កាត់លើវិថី និងស្ថាប័ននានាជាច្រើនដែលត្រូវចំណាយថវិកាសរុបប្រមាណ ១.៦៦០ លានបាត និងត្រូវកសាងរួចរាល់ជាស្ថាពរក្នុងរយ:ពេល ៩០០ ថ្ងៃ ប៉ុន្តែនៅក្នុងអំឡុងពេលកំពុងកសាង ក៏ស្រាប់តែត្រង់ចំណុចខាងលើដែលឆ្លងកាត់ពីលើផ្លូវបំបែកផងនោះក៏បានបាក់រលំប្រហែលជាង ១០០ ម៉ែត្រ បង្កអោយមានមនុស្សស្លាប់ និងរបួសជាច្រើននាក់ រីឯមធ្យោបាយធ្វើដំណើរក៏ត្រូវស្ពាននេះសង្កត់ជាច្រើនគ្រឿងផងដែរ ។

នៅក្នុងពេលនោះដែរ ក៏មានវត្តមានលោក ឆាត់ឆាត សិទ្ធិផាន់ អភិបាលក្រុងបាងកក ក៏បានអញ្ជើញចុះពិនិត្យ រួមជាមួយក្រុមវិស្វកម្ម ដើម្បីឲ្យដឹងថា តើត្រូវរុះរើនៅចំណុចណា ហើយត្រង់ណាដែលអសុវត្ថិភាព ដើម្បីដាក់កម្លាំង និងគ្រឿងចក្រធ្វើការរុះរើចេញ ហើយបញ្ហាដែលកើតឡើងទាំងអស់នេះ ខាងអ្នកម៉ៅការនឹងធ្វើការទទួលខុសត្រូវទាំងស្រុង៕

អត្ថបទ៖ សោ និយមរ័ត្ន