ទេសចរជិត ៣០ម៉ឺននាក់ ធ្វើដំណើរកម្សាន្តក្នុងសប្តាហ៍ទី​១ខែ កក្កដា

ភ្ញៀវទេសចរជាតិ និងអន្តរជាតិ បានធ្វើដំណើរកម្សាន្តនៅទូទាំងប្រទេសកម្ពុជា ប្រមាណជាង ២៨ម៉ឺននាក់ គិតចាប់ពីថ្ងៃទី ០៣-០៩ កក្កដា ឆ្នាំ ២០២៣។ នេះបើតាមរបាយការណ៍មន្ទីរទេសចរណ៍រាជធានីភ្នំពេញ។

របាយការណ៍ដដែល បានឱ្យដឹងថា សម្រាប់ភ្ញៀវទេសចរជាតិចំនួន ២៥០.៨៨៧ នាក់ និងភ្ញៀវអន្តរជាតិចំនួន ៣៦.០៧២ នាក់។

ចំណែកគោលដៅទេសចរណ៍សំខាន់ៗ រួមមាន៖ ខេត្តព្រះសីហនុទទួលបានភ្ញៀវទេសចរចំនួន ៦១.៣៨០ នាក់, ខេត្តបាត់ដំបង ៣៤.០៨០ នាក់, រាជធានីភ្នំពេញ ៣២.៧២៧ នាក់, ខេត្តកំពត ២៨.១៣៧ នាក់, ខេត្តសៀមរាប ២០.២៦៨ នាក់, ខេត្តកណ្តាល ២០.៥៤១ នាក់។

បើតាមមន្ទីរទេសចរណ៍រាជធានីភ្នំពេញ ការចេញដំណើរកម្សាន្តរបស់ភ្ញៀវទេសចរនេះ មានការថមថយប្រមាណ ៦,៣៨% ធៀបនឹងសប្តាហ៍កន្លងមក ក្នុងនោះ ភ្ញៀវជាតិ ថយចុះប្រមាណ ៨,១១% ខណៈដែលភ្ញៀវអន្តរជាតិ កើនឡើង ៧,៧៧%។

ដោយឡែកចំពោះការធ្លាក់ចុះចំនួនភ្ញៀវក្នុងស្រុកនេះ អាចមកពីមន្រ្តីរាជការ និងប្រជាពលរដ្ឋដែលជាថ្នាក់ដឹកនាំ និងសមាជិកគណបក្សប្រជាជនកម្ពុជា ដ៏ច្រើនលើសលុប ជាប់រវល់ក្នុងយុទ្ធនាការឃោសនាបោះឆ្នោត៕