អ្នកឧកញ៉ា គិត ម៉េង ស្នើឲ្យអូស្ត្រាលី បង្កើតការិយាល័យពាណិជ្ជកម្មនៅកម្ពុជា

ប្រធានសភាពាណិជ្ជកម្មកម្ពុជា អ្នកឧកញ៉ា គិត ម៉េងបានស្នើឲ្យរដ្ឋាភិបាលអូស្ត្រាលី បង្កើតការិយាល័យ​ពា​ណិជ្ជកម្មអូស្ត្រាលី (AusTrade) នៅកម្ពុជា ដើម្បីពង្រឹង និងពង្រីកទំនាក់ទំនងទ្វេភាគីឲ្យកាន់តែស្អិតរមួត។

ថ្លែងនៅក្នុង ជំនួបជាមួយបេសកជនពិសេសរបស់អូស្ត្រាលីសម្រាប់តំបន់អាស៊ីអាគ្នេយ៍ មកបំពេញបេសកកម្ម ក្នុងគោល​បំណងពង្រឹងចំណងទាក់ទងជាមួយវិស័យឯកជនកម្ពុជា កាលពីថ្ងៃទី១០ ខែកក្កដា ឧកញ៉ា គិត ម៉េង ប្រធានសភា​ពាណិជ្ជកម្មកម្ពុជា បានឱ្យដឹងថា ពាណិជ្ជកម្ម និងវិនិយោគរវាង កម្ពុជា-អូស្ត្រាលី បានបន្តកើនឡើងជានិច្ច និងទទួល​បានអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីអាស៊ាន-អូស្ត្រាលីណូវែលហ្សេឡង់ និងកិច្ចព្រមព្រៀងភាព​ជាដៃគូ​សេដ្ឋកិច្ចគ្រប់ជ្រុងជ្រោយតំបន់។

អ្នកឧកញ៉ា គិត ម៉េង បានបន្ថែមទៀតថា កម្ពុជា គឺជាប្រទេសដែលមានកំណើនសេដ្ឋកិច្ចលឿនជាងគេមួយក្នុងតំបន់ ដែលឆ្នាំ២០២៣នេះ ដោយកំណើនសេដ្ឋកិច្ចត្រូវបានព្យាករណ៍ក្នុងអត្រា ៥,៦ ភាគរយ។ បើតាមអ្នកឧកញ៉ា បច្ចុប្បន្ននេះ មានក្រុមហ៊ុនអូស្ត្រាលីជាច្រើនបាននិងកំពុងប្រកបអាជីវកម្មនៅកម្ពុជា។ លើសពីនេះទៀត ប្រធានពាណិជ្ជកម្មកម្ពុជា បានគាំទ្រដល់ការធ្វើពាណិជ្ជកម្ម និងវិនិយោគ រវាងប្រទេសទាំងពីរទៅលើគ្រប់វិស័យ ជាពិសេសវិស័យកសិកម្ម សុខាភិបាល ធនធានមនុស្ស និងវិស័យអប់រំ ជាដើម។

សូមបញ្ជាក់ថា គិតត្រឹមរយៈពេល ៦ខែ ឆ្នាំ ២០២៣ ពាណិជ្ជកម្មរវាងកម្ពុជា និងអូស្ត្រាលីមានចំនួនជាង ២៥០​លានដុល្លារ  ក្នុងនោះកម្ពុជា នាំចេញទៅកាន់ប្រទេសអូស្រ្តាលី បានប្រមាណ ១៨០ លានដុល្លារ មានការថយចុះ ០.៤ ភាគរយៈ បើធៀនឹងរយៈពេលដូចគ្នាក្នុងឆ្នាំ ២០២២ កន្លងមក ដោយឡែកចំពោះការនាំចូលវិញ មានទំហំទឹកប្រាក់​ប្រមាណជិត ៧៨ លានដុល្លារ។ នេះបើយោងតាមស្ថិតិជញ្ជីពាណិជ្ជកម្មរបស់អគ្គនាយកដ្ឋានគយ និងរដ្ឋាករ៕

អត្ថបទ៖ ផល ធារិត