ផ្ទុះបំពង់បង្ហូរហ្គាសនៅភាគខាងត្បូងអ៊ីរ៉ាក់សម្លាប់មនុស្ស ២ នាក់ និងរបួស ៥១ នាក់

ប្រភពពីប៉ូលិសបាននិយាយនៅថ្ងៃសៅរ៍ ទី៣១​ ខែតុលានេះថា យ៉ាងហោចណាស់មនុស្ស ២ នាក់បានស្លាប់ និង ៥១ នាក់រងរបួស បន្ទាប់ពីការផ្ទុះបំពង់បង្ហូរហ្គាសនៅភាគខាងត្បូងប្រទេសអ៊ីរ៉ាក់ ។

ការផ្ទុះនេះបានកើតឡើងកាលពីយប់ថ្ងៃសុក្រនៅជិតទីក្រុង Samawa ចម្ងាយ ២៧០ គីឡូម៉ែត្រភាគខាងត្បូងនៃទីក្រុង Baghdad ហើយក្រុមពន្លត់អគ្គិភ័យបានគ្រប់គ្រងភ្លើង បន្ទាប់ពីបានបិទបណ្តាញហ្គាស ។

សេចក្តីថ្លែងការណ៍មួយរបស់យោធាបាននិយាយថា ដំបូងឡើយការផ្ទុះបំពង់បង្ហូរហ្គាសបានសម្លាប់កុមារ ២ នាក់ និងរងរបួស ២៨ នាក់ក្នុងនោះមានអ្នកប្រយុទ្ធនិកាយស៊ីអ៊ីត ៩ នាក់ផងដែរ ។ មូលហេតុនៃការផ្ទុះនេះនៅមិនទាន់ដឹងនៅឡើយទេ ហើយក្រុមពន្លត់អគ្គិភ័យកំពុងព្យាយាមពន្លត់ភ្លើង ។

ទន្ទឹមនោះមន្ត្រីពីរនាក់បាននិយាយថា ការផ្ទុះនេះមិនមានផលប៉ះពាល់ដល់ប្រតិបត្តិការផលិតកម្ម និងដំណើរការហ្គាសរបស់ប្រទេសអ៊ីរ៉ាក់នោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS