ថៃ​ ក្លាយ​ជា​ប្រទេសនាំចេញត្រីខកំប៉ុងលំដាប់លេខ ២ លើលោក និងកំពូលនៅអាស៊ាន​

ប្រទេសថៃបានក្លាយជាប្រទេសនាំចេញត្រីខកំប៉ុង និងផលិផលត្រី​កែច្នៃធំជាងគេទី ២ របស់ពិភពលោក បន្ទាប់ពីប្រទេសចិន និងជាប្រទេសនាំចេញច្រើនជាងគេបំផុតក្នុងតំបន់អាស៊ាន ។

ថៃបាននាំចេញត្រីកំប៉ុង និងត្រីកែច្នៃសរុបមានតម្លៃជាង ១.១៤ ពាន់លានដុល្លារអាមេរិកក្នុងរយៈពេល ៥ ខែដំបូងនៃឆ្នាំនេះ ។ ទន្ទឹមនឹងនេះ តម្លៃនៃការនាំចេញទៅកាន់ទីផ្សារពាណិជ្ជកម្មសេរី (FTAs) មានចំនួនជាង ៣៥២ លានដុល្លារអាមេរិក ដែលមានកំណើន ១៥.៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។

ជាមួយគ្នានេះ ទីផ្សារពាណិជ្ជកម្មសេរីសម្រាប់ត្រីខកំប៉ុង ក៏មានកំណើនជាបន្តបន្ទាប់ផងដែរពីប្រទេសផ្សេងទៀតដូចជា ជប៉ុន កើនឡើង ២២.៧ ភាគរយ, ឈីលី ៩៦.៧ ភាគរយ, ប៉េរូ ១៨៣.១ ភាគរយ, ចិន ២៥.៧ ភាគរយ, កម្ពុជាមាន ១១.៩ ភាគរយ និងហ្វីលីពីនមាន ១៣៨.១ ភាគរយ ។

សម្រាប់ទីផ្សារនាំចេញសំខាន់ៗរបស់ប្រទេសថៃវិញរួមមាន ជប៉ុន អូស្ត្រាលី ឈីលី និងកូរ៉េខាងត្បូង ខណៈបច្ចុប្បន្ន ថៃមានកិច្ចព្រមព្រៀង​ពាណិជ្ជកម្មសេរី​​ជាមួយដៃគូចំនួន ១៨ ក្នុងនោះ ១៥ ស្ថិតនៅក្នុងអាស៊ាន ចិន អូស្ត្រាលី នូវែលសេឡង់ ឈីលី និងហុងកុង ។ ជាពិសេសប្រទេសទាំងនោះ បានលុបចោលពន្ធនាំចូលពីថៃ លើកលែងតែប្រទេសជប៉ុន កូរ៉េខាងត្បូង និងឥណ្ឌាប៉ុណ្ណោះដែលនៅតែយកពន្ធនាំចូលលើផលិតផលមួយចំនួន ។

គួរបញ្ជាក់ថា ប្រទេសជប៉ុន បាន​ដាក់​ពន្ធ​នាំចូល ៥ ភាគរយលើ​ត្រី​សាឌីន​កំប៉ុង, ត្រី​ម៉ា​កឺរ៉េ​ល និង​ពង​ត្រី​ ខណៈកូរ៉េខាងត្បូងយកពន្ធ ១៦ ភាគរយលើត្រីសាឌីនកំប៉ុង, ២០ ភាគរយលើត្រីធូណាកំប៉ុង និង ៣០ ភាគរយលើត្រីខកំប៉ុង ៕

ប្រែសម្រួល៖​ នាង រតនៈ

ប្រភព៖​ The Nation Thailand

ចុចអាន ៖ សេដ្ឋកិច្ច ចិន មិនសម្រេចតាមការព្យាករណ៍ឡើយ ស្របពេលយុវជនគ្មាន ការងារធ្វើក៏កើនឡើង