ព័ត៌មានអន្ដរជាតិ

ជំងឺធ្ងន់ធ្ងរចំនួន ៣ នឹងកើតលើមនុស្សជាតិដែលរងគ្រោះដោយគ្រាប់បែកចង្កោម

បានផុស

១ year មុន

នៅ

ថ្ងៃពុធ ១៩ កក្កដា ២០២៣

ដោយ

ពិភពលោកកំពុងសម្ដែងក្ដីព្រួយបារម្ភយ៉ាងខ្លាំង ពាក់ព័ន្ធទៅនឹងរឿងរ៉ាវគ្រាប់បែកចង្កោមដែលអាមេរិកប្រកាលផ្ដល់ទៅឲ្យអ៊ុយក្រែន ដោយសារតែវាក៏ត្រូវបានគេចាត់ទុកថាជាអាវុធប្រល័យលោកមួយប្រភេទផងដែរ ជាពិសេសជំងឺ និងហានិភ័យដែលកើតចេញពីអាវុធដ៏សាហាវមួយនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងបញ្ហានេះដែរ លោកស្រីបណ្ឌិត Helen Caldicott ដែលជាសកម្មជនសន្តិភាពពិភពលោក បានប្រាប់សារព័ត៌មាន Sputnik ថា គ្រាប់បែកចង្កោមដែលជាប្រភេទអាវុធមានជាតិវិទ្យុសកម្មនៅលើក្បាលគ្រាប់ នឹងបង្កជំងឺធ្ងន់ធ្ងរចំនួន ៣ ទៅលើមនុស្សជាតិដែលរងគ្រោះពីអាវុធដ៏ប្រល័យមួយនេះ ។

លោកស្រី Caldicott បានបញ្ជាក់ថា ជំងឺធ្ងន់ធ្ងរចំនួន ៣ ដែលបង្កទៅដល់ជនរងគ្រោះពីគ្រាប់បែកចង្កោមរបស់អាមេរិកបញ្ជូនទៅឲ្យរដ្ឋាភិបាលទីក្រុងកៀវ មានដូចជា ជំងឺមហារីកធ្ងន់ធ្ងរ ខូចហ្សែន និងខូចទ្រង់ទ្រាយពីកំណើតអស់មួយជីវិត ដោយសារតែកម្រិតជាតិវិទ្យុសកម្មរបស់វា ។

សហរដ្ឋអាមេរិកបានប្រកាសផែនការបញ្ជូនគ្រាប់បែកចង្កោមទៅកាន់អ៊ុយក្រែននៅថ្ងៃទី៧ ខែកក្កដា ប៉ុន្តែទោះជាយ៉ាងណាក៏ដោយ អង្គការសហប្រជាជាតិ និងសម្ព័ន្ធមិត្តមួយចំនួនរបស់ទីក្រុងវ៉ាស៊ីនតោនបានប្រឆាំងនឹងការសម្រេចចិត្តនេះ ខណៈសមាជិកគណបក្សប្រជាធិបតេយ្យជាច្រើនក៏មិនយល់ស្របនឹងផែនការរបស់រដ្ឋបាលលោក Joe Biden ផងដែរ ។

គួរបញ្ជាក់ថា ការប្រើប្រាស់គ្រាប់បែកចង្កោមក៏ត្រូវបានថ្កោលទោសដោយអង្គការសិទ្ធិមនុស្សអន្តរជាតិជាច្រើនផងដែរ ដោយសារតែគ្រាប់បែកប្រភេទនេះរហូតដល់ ៤០ ភាគរយមិនផ្ទុះភ្លាមៗនោះទេ ប៉ុន្តែវាអាចសម្លាប់មនុស្ស ឬបណ្តាលឲ្យពិការនៅប៉ុន្មានឆ្នាំ ឬច្រើនទសវត្សរ៍ បន្ទាប់ពីវារាយប៉ាយ ។ ជាក់ស្ដែងចាប់តាំងពីសង្គ្រាមលោកលើកទី ២ មក គ្រាប់បែកចង្កោមបានសម្លាប់ជនស៊ីវិលប្រមាណពី ៥៦,៥០០ នាក់ទៅ ៨៦,៥០០ នាក់ ៕