លោកឧកញ៉ា លឹម ហេង មានជំនឿថា ក្រោយបោះឆ្នោត នឹងមានកំណើន​វិនិយោគច្រើនពីបរទេស

កម្ពុជា បានអនុវត្តច្បាប់វិនិយោគថ្មី និងកិច្ចព្រមព្រៀងសេរីពាណិជ្ជកម្មផ្សេងៗ ជាពិសេស មានសុខសុវត្ថិភាព ដែលមិនបង្កហានិភ័យសម្រាប់ការដាក់ទុនវិនិយោគពីបរទេស។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានជំនឿថា ក្រោយការបោះឆ្នោតអាណត្តិទី៧នេះ ក្រោមការដឹកនាំរបស់រាជរដ្ឋាភិបាលថ្មី កម្ពុជា នឹងមានកំណើននៃការវិនិយោគ និងការប្រកបមុខរបរផ្សេងៗ កើនឡើងជាលំដាប់។

បើតាមលោកឧកញ៉ា លឹម ហេង រហូតមកដល់ពេលនេះ កម្ពុជា មានកំណើនវិនិយោគស្ទើរគ្រប់វិស័យ មានដូចជា វិស័យឧស្សាកម្មធុនតូច និងមធ្យម រហូតដល់ធុនធ្ងន់ ដំឡើងរថយន្ត រោងចក្រផលិតសម្បកកង់ ការកែច្នៃផលិតផល​ក សិកម្ម ធនធានរ៉ែ កម្មន្តសាល និងគ្រឿងបង្គុំអគ្គិសនី ជាដើម ពោលគឺមានចម្រុះវិស័យ។ លោកសង្កត់ធ្ងន់ថា ទាំងនេះ គឺជាអនុវិស័យដែលបានគាំទ្រដល់សេដ្ឋកិច្ចយ៉ាងសំខាន់របស់កម្ពុជា។

នៅក្នុងរយៈពេល៦ខែឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោង​វិនិយោគចំនួន​៨៤គម្រោង មានទុនចំនួន ៩៤៦,៩៤ លានដុល្លារអាមេរិក ដោយបង្កើតឱកាសការងារជូនប្រជាពលរដ្ឋបានចំនួន ១១៦០៧៣កន្លែង។

បើតាម CDC ក្នុងចំណោមគម្រោងចំនួន ៨៤ នេះ គម្រោងដែលបោះទុនវិនិយោគច្រើនជាងគេ គឺគម្រោងបង្កើត​រោងចក្រផលិតសំបកកង់យានយន្តនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ខេត្តក្រចេះ​ មានទុនប្រមាណ ១៣៨លានដុល្លារ។ បន្ទាប់មកគម្រោងបង្កើតរោងចក្រផលិតស៊ីម៉ង់ត៍នៅស្រុករតនមណ្ឌល ខេត្តបាត់ដំបង ក្នុងទុនវិនិ​យោគ​ប្រមាណ ៩៥លានដុល្លារ  និងគម្រោងបង្កើតកសិដ្ឋានចិញ្ចឹមគោពូជ និងគោសាច់ខ្នាតធំនៅស្រុកស្នួល ខេត្តក្រចេះ ក្នុងទុនវិនិយោគប្រមាណ ៧៣,៤លានដុល្លារ។

ធនាគារជាតិនៃកម្ពុជា បានព្យាករថា សេដ្ឋកិច្ចកម្ពុជា ក្នុងឆ្នាំ២០២៣នេះ នឹងមានកំណើន ៥.៥ភាគរយ ជាមួយនឹង​កម្រិតអតិផរណាទាបប្រមាណ ២ភាគរយ៕