ទូតចិន មើលឃើញថា ការរៀបចំការបោះឆ្នោតនៅកម្ពុជា ប្រកបដោយវិជ្ជាជីវៈ និងស្របតាមច្បាប់របស់កម្ពុជា

ឯកអគ្គរដ្ឋទូតចិនប្រចាំកម្ពុជា បានលើកឡើងថា ការរៀបចំការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅកម្ពុជា កាលពីថ្ងៃទី ២៣ ខែកក្កដា ឆ្នាំ ២០២៣ បានប្រព្រឹត្តទៅប្រកបដោយវិជ្ជាជីវៈ និងបានអបអរសាទរចំពោះប្រជាពលរដ្ឋកម្ពុជា ដែលបានសម្ដែងឆន្ទៈរបស់ខ្លួនដ៏ច្រើនលើសលប់។

ការលើកឡើងនេះ គឺនៅក្នុងកិច្ចប្រជុំដែលរៀបចំឡើងដោយ គ.ជ.ប ដឹកនាំដោយលោក នុត សុខុម អនុប្រធាន គ.ជ.ប ជាមួយអ្នកសង្កេតការណ៍បោះឆ្នោតអន្តរជាតិ កាលពីព្រឹកថ្ងៃទី ២៤ ខែកក្កដា ឆ្នាំ​ ២០២៣។

សេចក្ដីប្រកាសព័ត៌មានរបស់ គ.ជ.ប បានឲ្យដឹងថា នៅក្នុងកិច្ចប្រជុំនោះ លោក នុត សុខុម អនុប្រធាន គ.ជ.ប បានថ្លែងអំណរគុណ ចំពោះអ្នកសង្កេតការណ៍បោះឆ្នោតអន្តរជាតិទាំងអស់។ លោកថា ការបោះឆ្នោតជ្រើសតាំង តំណាង រាស្ត្រ នីតិកាលទី ៧ កាលពីថ្ងៃអាទិត្យ ទី ២៣ ខែកក្កដា ឆ្នាំ ២០២៣ គឺ ការិយាល័យបោះឆ្នោតនៅទូទាំងប្រទេស ដែលមានចំនួន ២៣,៧៨៩ការិយាល័យ បានបើកដំណើរការទាំងអស់។

ចំពោះអ្នកដែលបានចេញទៅបោះឆ្នោត សរុបនៅទូទាំងប្រទេស មានចំនួន ៨,២១៣,២៦០នាក់ ស្មើនឹង ៨៤.៥៨ភាគរយ ដែលជាតួលេខបណ្តោះអាសន្ន នៃអ្នកមានឈ្មោះក្នុងបញ្ជីបោះឆ្នោត ចំនួន ៩,៧១០,៦៥៥នាក់។ អនុប្រធាន គ.ជ.ប បានវាយតម្លៃថា ជាទូទៅការបោះឆ្នោតប្រកបដោយ សេរី យុត្តិធម៌ ស្ថិតក្នុងបរិយាកាសស្ងប់ស្ងាត់ សន្តិភាព គ្មានអំពើហិង្សា និងប្រព្រឹត្តទៅដោយរលូន។

នៅក្នុងឱកាសនោះដែរ លោក វ៉ង វិនធៀន ឯកអគ្គរដ្ឋទូតចិនប្រចាំកម្ពុជា បានមើលឃើញថា ការរៀបចំការបោះឆ្នោតប្រកបដោយវិជ្ជាជីវៈ និងសូមអបអរសាទរចំពោះប្រជាពលរដ្ឋកម្ពុជា ដែលបានសម្តែងនូវឆន្ទៈ និងអនុវត្តសិទ្ធិរបស់ខ្លួន ដោយចេញទៅបោះឆ្នោត់មានចំនួន យ៉ាងច្រើនបានដល់ ៨៤,៥៨ភាគរយ។ ចំពោះដំណើរការបោះឆ្នោត និងរាប់សន្លឹកឆ្នោត បានប្រព្រឹត្តទៅស្របតាមច្បាប់របស់ព្រះរាជាណាចក្រកម្ពុជា។

លោក វ៉ង វិនធៀន បា​នលើកឡើងថា គណបក្សនយោបាយទាំង ១៨ បានឃោសនាបោះឆ្នោតដោយសេរី នៅទូទាំងប្រទេស ក្នុងរយៈពេល ២១ថ្ងៃកន្លងមកនេះ។ លោកថា ប្រជាពលរដ្ឋទទួលបានព័ត៌មានគ្រប់គ្រាន់ ក្នុងការជ្រើសរើសគណបក្សនយោបាយ ដែលខ្លួនពេញចិត្ត។

ឯកអគ្គរដ្ឋទូតចិន បានបញ្ជាក់ទៀតថា លទ្ធផលនៃការបោះឆ្នោត គឺអាចទទួលយកបាន ហើយប្រទេសចិនគាំទ្រនូវជម្រើសរបស់ប្រជាជនកម្ពុជា ក្នុងការការពារឯករាជ្យ និងអធិបតេយ្យភាពរបស់ខ្លួន ដោយមិនមានការជ្រៀតជ្រែកពីភាគីបរទេស៕