អ៊ុយក្រែន ប្តេជ្ញាវាយប្រហារបន្ថែមទៀត នៅឧបទ្វីប គ្រីមៀ

រដ្ឋមន្ត្រីការពារជាតិអ៊ុយក្រែនលោក Aleksey Reznikov បានប្តេជ្ញាថា នឹងបន្តវាយប្រហារគោលដៅរុស្ស៊ីនៅឧបទ្វីប គ្រីមៀ ដោយនិយាយថា ការធ្វើបែបនេះ នឹងបណ្តាលឲ្យសមត្ថភាពរបស់ទីក្រុងមូស្គូក្នុងការប្រយុទ្ធប្រឆាំងកងកម្លាំងរបស់ទីក្រុងកៀវ ចុះថមថយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Reznikov បានធ្វើការអត្ថាធិប្បាយបែបនេះ នៅក្នុងបទសម្ភាសរបស់ CNN ដែលចាក់ផ្សាយកាលពីថ្ងៃអង្គារទី២៥ខែកក្កដា ដោយអះអាងថា ការវាយប្រហារលើស្ពាននិងគោលដៅផ្សេងទៀតនៅគ្រីមៀ នឹងជួយសង្រ្គោះជីវិតប្រជាជនអ៊ុយក្រែន។

លោកនិយាយថា “វាជាយុទ្ធសាស្ត្រធម្មតា ក្នុងការបំផ្លាញខ្សែសង្វាក់ដឹកជញ្ជូនរបស់សត្រូវ ដើម្បីបញ្ឈប់ពួកគេមិនឲ្យទទួលបានគ្រាប់រំសេវ ប្រេងឥន្ធនៈ ឬស្បៀងកាន់តែច្រើន។ នោះហើយជាមូលហេតុដែលយើងនឹងប្រើល្បិចទាំងនេះប្រឆាំងនឹងពួកគេ”។

គួរបញ្ជាក់ថា អ៊ុយក្រែនបានកំណត់គោលដៅម្តងហើយម្តងទៀតលើស្ពាន គ្រីមៀ របស់រុស្ស៊ីដែលតភ្ជាប់ទៅឧបទ្វីប Taman ក្នុងតំបន់ Krasnodar។ ការវាយប្រហារចុងក្រោយបំផុត កាលពីសប្តាហ៍មុនដោយយន្តហោះគ្មានមនុស្សបើកពីរគ្រឿងនៅលើសមុទ្រ បានសម្លាប់ប្តីប្រពន្ធមួយគូមកពីតំបន់ Belgorod និងបណ្តាលឲ្យកូនស្រីអាយុ១៤ឆ្នាំរបស់ពួកគេ រងរបួស។

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានហៅឧប្បត្តិហេតុនោះថាជា “ការវាយប្រហារភេរវកម្មមួយទៀត ដោយរបបក្រុងកៀវ”។ ក្រោយមក កងកម្លាំងរុស្ស៊ី បានឆ្លើយតប ដោយការវាយប្រហារតាមអាកាសប្រឆាំងនឹងគោលដៅយោធានៅ Odessa រួមទាំងកំពង់ផែសមុទ្រខ្មៅផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Zelensky បញ្ជាក់ថា អ៊ុយក្រែន ត្រៀមរួចហើយ ដើម្បីវាយយកតំបន់ គ្រីមៀ មកវិញ