ស្លាប់១៤៥នាក់ ក្នុងករណីគ្រោះថ្នាក់ចរាចរណ៍រយៈពេល ២៧ ថ្ងៃ

តាមរបាយការណ៍របស់អគ្គស្នងការនគរបាលជាតិបានឲ្យដឹងថា ក្នុងរយៈពេល២៧ ថ្ងៃ ដោយគិតចាប់ពីថ្ងៃទី០១ ដល់ថ្ងៃទី២៧ ខែមករា ឆ្នាំ២០២១នេះ មានករណីគ្រោះថ្នាក់ចរាចរណ៍កើតឡើងចំនួន២៥៤ លើក ធ្វើឲ្យមនុស្សស្លាប់ចំនួន១៤៥ នាក់ របួសចំនួន៣៥៧ នាក់ របួសធ្ងន់ចំនួន២២៤ នាក់។

ដោយឡែកថ្ងៃទី២៧ ខែមករា ឆ្នាំ២០២១ នេះ មានករណីគ្រោះថ្នាក់ចរាចរណ៍ចំនួន០៣ លើក ក្នុងនោះស្លាប់ចំនួន០២នាក់ របួសចំនួន០៤ នាក់ ក្នុងនោះរបួសធ្ងន់ចំនួន០៣ នាក់ ដែលករណីគ្រោះថ្នាក់ចរាចរណ៍នេះ បានកើតឡើងនៅតាមរាជធានី ខេត្ត ចំនួន០៣។

លោកឧត្តមសេនីយ៏ឯក ឆាយ គឹមខឿន អ្នកនាំពាក្យ អគ្គស្នងការនគរបាលជាតិបានឲ្យដឹងដែរថា សម្រាប់ថ្ងៃទី២៧ ខែមករា នេះដែរ នគរបាលចរាចរណ៏ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន៩៤៧ គ្រឿង ក្នុងនោះមានម៉ូតូចំនួន៧០២ គ្រឿង និងរថយន្តគ្រប់ប្រភេទចំនួន២៤៥ គ្រឿង។

ក្នុងចំណោមម៉ូតូល្មើសទាំង៧០២ គ្រឿងនោះ បើកបរដោយអត់មួកសុវត្ថិភាពចំនួន៦៣៨ នាក់, បើកបរល្មើសសញ្ញាចំនួន២៨ គ្រឿង, ស្រវឹងចំនួន០៧ នាក់, បើកបរដោយអត់ស្លាកលេខចំនួន១៩ គ្រឿង និងបើកបរប្រើទូរស័ព្ទចំនួន០៩ នាក់។

ចំណែករថយន្តទាំង២៤៥ គ្រឿងនោះ មានរថយន្តតូចចំនួន២១៨ គ្រឿង និងរថយន្តធំចំនួន២៧ គ្រឿង ហើយក្នុងចំណោមយានយន្តទាំងនោះ មានល្មើសល្បឿនចំនួន៨១ គ្រឿង, អត់មានប័ណ្ណបើកបរចំនួន០៥ នាក់, ល្មើសញ្ញាចំនួន១៣ គ្រឿង, បត់ជែងចំនួន០១ គ្រឿង, បើកបរអត់ដាក់ខ្សែក្រវ៉ាត់ចំនួន៩៧ នាក់, លើសចំណុះចំនួន១១ គ្រឿង, បើកបរក្នុងស្ថានភាពស្រវឹងចំនួន០៤ នាក់, អត់ស្លាកលេខចំនួន០៧ គ្រឿង និងបើកបរប្រើទូរសព្ទចំនួន២៦ នាក់។

ចំណែករយៈពេល២៧ថ្ងៃ ក្នុងខែមករានេះ មានយានយន្តល្មើសចំនួន២៥១៧៤ គ្រឿង ត្រូវបានពិនិត្យ និងពិន័យ ក្នុងនោះម៉ូតូចំនួន១៨៥៧១ គ្រឿង និងរថយន្តគ្រប់ប្រភេទចំនួន៦៦០៣ គ្រឿង ក្នុងនោះរថយន្តតូចចំនួន៥៣០៨ គ្រឿង និងរថយន្តធំចំនួន១២៩៥ គ្រឿង៕

អត្ថបទ៖ កោះកែវ