តារាកំប្លែងជើងចាស់ថៃ គាំទ្រលោក ថាក់ស៊ីន វិលត្រលប់ចូលស្រុកវិញ

កាលពីថ្ងៃពុធលោកស្រី Paetongtarn បានបង្ហោះសារនៅលើបណ្ដាញសង្គម Facebook ថា អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា នឹងចុះចតនៅ​ព្រលានយន្តហោះ​ដន​មឿងក្នុងទីក្រុងបាងកក ដើម្បីត្រឡប់ចូលស្រុកវិញនៅថ្ងៃទី១០ ខែសីហា ឆ្នាំ២០២៣ ក្រោយចំណាយពេលរស់នៅនិរទេសខ្លួនអស់រយៈពេល ១៧ ឆ្នាំ ។

យ៉ាងណាមិញ ដំណឹងដ៏រសើបរបស់អតីតនាយករដ្ឋមន្ត្រីថៃវិលចូលស្រុក បានធ្វើឲ្យមហាជនមានការភ្ញាក់ផ្អើលជាថ្មីម្ដងទៀត ព្រោះនេះមិនមែនជារឿងថ្មីដែលលោកថាក់ស៊ីនប្រកាសវិលចូលស្រុកកំណើតវិញឡើយ។ ទន្ទឹមគ្នានោះដែរ ការវិលមកវិញរបស់លោកមានមនុស្សជាច្រើនបានផ្ញើរការនឹករលឹកនិងគាំទ្រយ៉ាងពេញទំហឹង ខណៈតារាកំប្លែងជើងចាស់លោក Suthep Pongam បានទម្លាយអារម្មណ៍ពិតរបស់ខ្លួនតាមរយៈប្រព័ន្ធផ្សព្វផ្សាយ​មិនខុសពីអ្នកផ្សេងទៀត។

តាមរយៈបណ្ដាញសង្គមផ្ទាល់ខ្លួន តួកំប្លែងក្នុងរឿង​ “ខ្មោចថៃកំប្លែង” រូបនេះបានបញ្ចេញមតិថា “ខ្ញុំឃើញវាល្អណាស់! ការវិលមកវិញរបស់លោកថាក់ស៊ីនគឺជារឿងដ៏វិសេសមួយ។ ទោះមិនដឹងថាវាយ៉ាងម៉េច តើគាត់​នឹង​ត្រូវ​ទទួល​ទោស​យ៉ាង​ណា? តែខ្ញុំយល់ថាគាត់នៅតែជាជនជាតិថៃ ហើយគាត់ទៅ​ក្រៅប្រទេសយូរក្រែលល្មមតែនឹកស្រុកកំណើតចង់វិលមកផ្ទះរស់នៅជុំគ្រួសារដូចគេដទៃដែរ។ ដូច្នេះខ្ញុំសូមគាំទ្រការវិលមកដល់ទឹកដីថៃ​ របស់អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា”។

គួរបញ្ជាក់ដែរថា គិតត្រឹមពេលនេះលោក ថាក់ស៊ីន បាន​ពន្យារ​ពេល​វិល​ត្រឡប់​ចូលស្រុក​វិញ​ចំនួន ១៩ ដង​មកហើយ រាប់ចាប់តាំងពីការសន្យាចូលមកកាលពីដើមខែនេះផងដែរ បន្ទាប់ពីត្រូវបានទម្លាក់ចេញពីអំណាចក្នុងរដ្ឋប្រហារយោធាកាលពីឆ្នាំ ២០០៦ ហើយចាប់តាំងពីពេលនោះមកលោកបានរស់នៅក្នុងលក្ខណៈនិរទេសខ្លួនអស់រយៈពេល ១៧ ឆ្នាំមកហើយ ៕

ប្រែសម្រួល៖ សាង ស្រីល័ក្ខ

ចុចអាន៖បាងកក បញ្ជាឲ្យអ្នកបើកបររកុំធ្វើដំណើរទៅតំបន់ចំនួន ២ ក្នុងក្រុង ខ្លាចផ្ទុះបាតុកម្ម