បែរចិញ្ចឹមត្រីក្នុងស្ទឹងសង្កែ លើកថ្ងៃឱសានវាទជាលើកទីពីរ

ថ្ងៃឱសានវាទនៃការរើ​បែរចិញ្ចឹមត្រីនៅក្នុងស្ទឹងសង្កែ ត្រូវ​បាន​លើកពេល​ជាថ្មី​ម្តង​ទៀត​​។

ជួបជាមួយកម្ពុជាថ្មីតាម​ទូរស័ព្ទ កាលពីថ្ងៃទី៣០ ខែកក្កដា លោកជួង សុភា នាយខណ្ឌរដ្ឋបាលជលផលខេត្ត​បាត់ដំបង​លើកឡើងយ៉ាងខ្លីថា ឱសានវាទត្រូវបានលើកមកត្រឹមខែសីហាខាងមុខនេះវិញ ដោយសារកន្លែងខ្លះត្រីនៅតូចៗហើយក្រោយពីចាប់ត្រីចេញអស់ហើយ បើគេចង់រុះរើបែរចេញឬមិនរុះរើអាស្រ័យទៅលើម្ចាស់ ហើយសំខាន់លើអាជ្ញាធរខេត្តបញ្ជាឬមិនបញ្ជាតែប៉ុណ្ណោះ។

ជាយូរយាណាស់មកហើយដែលគេសង្គេតឃើញថា នៅក្នុងទឹកស្ទឹងសង្កែ នៃខេត្តបាត់ដំបង មានបែរបណ្តែតលើផ្ទៃទឹកដើម្បីចិញ្ចឹមត្រីជិត ១០០បែរ ដែលជារបស់ប្រជាពលរដ្ឋជាង ៤០ ម្ចាស់ ដែលការចិញ្ចឹមនេះបានធ្វើឲ្យ​ទឹកមានការប្រែប្រួល និងអាចខូចបរិស្ថានទឹក ដែលកន្លងមក លោក កត បូរ៉ាន់ ប្រធានមន្ទីរបរិស្ថានធ្លាប់បានលើកឡើងថាទាំងអាចម៍ត្រី និងចំណីត្រីដែលរលួយនៅក្នុងទឹកធ្វើឲ្យ​ប៉ះពាល់ដល់ការទាញយកទឹកមកចែកចាយរបស់អង្គភាពរដ្ឋាករទឹកខេត្តបាត់ដំបងផងដែរ។

កាលពីអំឡុងដើមឆ្នាំ២០២៣ រដ្ឋបាលខេត្តនិងលោក ជួង សុភា នាយខណ្ឌរដ្ឋបាលជលផលបានចុះត្រួតពិនិត្យតាមបែរនីមួយៗ តាមបណ្តោយដងស្ទឹងសង្កែដោយបានកំណត់ថ្ងៃឱសានវាទ ក្នុងការចាប់ត្រីចេញ​ឲ្យ​អស់ត្រឹមថ្ងៃចូលឆ្នាំខ្មែរ ក្នុងអំឡុងខែមេសា ដើម្បីថែរក្សាបរិស្ថានទឹកស្ទឹងអោយបានស្អាតល្អ។

ផ្ទុយទៅវិញគេសង្គេតឃើញថា ការចិញ្ចឹមត្រីនៅតែមានសកម្មភាពដដែលហើយកាត់តែមានការពង្រីកខ្លាំងជាងមុន។ ក្នុងនោះដែរក៏បានលើកឡើងថា តើការពន្យាពេលឱសានវាទដល់ពេលណាទៀត បើជំនាញមិនបញ្ជា​ឲ្យ​ម្ចាស់រើចេញក្រោយចាប់ត្រីអស់ ចុះបើគេទម្លាក់កូនត្រីចូលវិញ តើត្រូវលើកពេលបន្តទៀតដែរឬទេ?

អត្ថបទ ÷ សោ និយមរ័ត្ន