កាន់តែច្បាស់ពីម៉ោងពេលដែលលោក ថាក់ស៊ីន នឹងជាន់ទឹកដី ថៃ សាជាថ្មី

ការប្រកាសវិលត្រឡប់ចូលប្រទេសថៃរបស់លោក ថាក់ស៊ីន ស៊ីណាវ៉ាត់ត្រា នៅថ្ងៃទី១០ ខែសីហាខាងមុខនេះ កំពុងក្លាយជាប្រធានបទដ៏ក្ដៅគគុកមួយ ក៏ដូចជាផ្ទុះការវែកញែកជាច្រើន ជាពិសេសមានការចាក់សួរថាតើការប្រកាសចូលស្រុករបស់អតីតនាយករដ្ឋមន្ត្រីថៃលើកនេះជាការពិត ឬយ៉ាងណា ។

យោងតាមប្រភពពីការិយាល័យប៉ូលិសថៃបានឲ្យដឹងកាលពីថ្ងៃអាទិត្យថា តាមការគ្រោងទុក លោក ថាក់ស៊ីន នឹងវិលចូលស្រុកនៅថ្ងៃទី១០ ខែសីហា ប្រាកដមែន ហើយជើងហោះហើររបស់អតីតនាយករដ្ឋមន្ត្រីរូបនេះនឹងចុះចតនៅអាកាសយានដ្ឋានអន្តរជាតិដនមឿង ក្នុងទីក្រុងបាងកកនាវេលាម៉ោង ១០ និង ៣០ នាទីព្រឹក ។

គិតត្រឹមពេលនេះលោក ថាក់ស៊ីន បាន​ពន្យារ​ពេល​វិល​ត្រឡប់​ចូលស្រុក​វិញ​ចំនួន ១៩ ដង​មកហើយ រាប់ចាប់តាំងពីការសន្យាចូលមកកាលពីដើមខែនេះផងដែរ បន្ទាប់ពីត្រូវបានទម្លាក់ចេញពីអំណាចក្នុងរដ្ឋប្រហារយោធាកាលពីឆ្នាំ ២០០៦ ហើយចាប់តាំងពីពេលនោះមកលោកបានរស់នៅក្នុងលក្ខណៈនិរទេសខ្លួនអស់រយៈពេល ១៧ ឆ្នាំមកហើយ ។

ទោះយ៉ាងណា លោក ថាក់ស៊ីន ក៏ប្រឈមនឹងក្ដីក្ដាំជាប់ពន្ធនាគាររយៈពេល ១០ ឆ្នាំផងដែរ នៅក្នុងសំណុំរឿងសំខាន់ៗចំនួន ៣ ករណី ក្រោយការចោទប្រកាន់របស់នាយកដ្ឋានព្រហ្មទណ្ឌនៃតុលាការកំពូលសម្រាប់អ្នកកាន់តំណែងនយោបាយ ប្រសិនបើលោកវិលត្រឡប់ចូលស្រុកតាមការគ្រោងទុកមែននោះ ។

គួរបញ្ជាក់ថា ផែនការវិលត្រឡប់ចូលស្រុកវិញរបស់លោក ថាក់ស៊ីន នេះដែរក៏កើតឡើង ចំពេលដែលគណបក្សភឿថៃកំពុងព្យាយាមដឹកនាំកិច្ចប្រឹងប្រែង​បង្កើតរដ្ឋាភិបាលថ្មី ក្រោយឈ្នះបានអាសនៈច្រើនជាងគេលំដាប់ទី២ ក្នុងការបោះឆ្នោតសកលកាលពីខែឧសភា ស្របពេលដែលកូនស្រីរបស់លោក គឺលោកស្រី ផេថងថាន ក៏ជាបេក្ខជនម្នាក់ ក្នុងចំណោមបេក្ខជននាយករដ្ឋមន្រ្តីសរុប ៣ នាក់ របស់គណបក្សភឿថៃផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស