អូស្ត្រាលី ប្រគល់រូបចម្លាក់បុរាណដ៏មានតម្លៃចំនួន៣ដែលត្រូវបានគេលួច មកឲ្យកម្ពុជាវិញ

ថ្មីៗនេះ វិចិត្រសាលជាតិអូស្ត្រាលី National Gallery of Australia, Canberra បានប្រគល់រូបចម្លាក់បុរាណសំរឹទ្ធដ៏មានតម្លៃចំនួន ៣ ពីការប្រមូលរក្សាទុកវត្ថុបុរាណពីអាស៊ីរបស់ខ្លួនមកកាន់ប្រទេសកម្ពុជាវិញ។ នេះបើតាមការបង្ហាញឲ្យដឹងរបស់ស្ថានទូតអូស្រ្តាលីប្រចាំនៅប្រទេសកម្ពុជានៅលើទំព័រហ្វេសប៊ុករបស់ខ្លួននៅរសៀលថ្ងៃទី០៣ ខែសីហា ឆ្នាំ២០២៣នេះ។

សម្រាប់ប្រទេសអូស្រ្តាលី នេះ គឺជាលើកទី១ហើយដែលវិចិត្រសាលរបស់អូស្រ្តាលីបានធ្វើការប្រគល់បេតិកភណ្ឌវប្បធម៌បែបនេះដល់ប្រទេសកម្ពុជា។ លោក វ៉ាយអេត ឯកអគ្គរាជទូតអូស្រ្តាលីប្រចាំប្រទេសកម្ពុជា បានជួបពិភាក្សាជាមួយក្រុមការងារកម្ពុជាពិភាក្សាពីបញ្ហានេះ មុនពេលរូបលោកធ្វើដំណើរទៅកាន់ប្រទេសអូស្ត្រាលី ដើម្បីចូលរួមពិធីប្រគល់ជាផ្លូវការនូវរូបចម្លាក់បុរាណនេះ។ ស្ថានទូតអូស្តា្រលី បានអះអាងថា លោកឯកអគ្គរាជទូតអូស្រ្តាលី ពិតជាមានទឹកចិត្តស្រឡាញ់បេតិកភណ្ឌវប្បធម៌របស់កម្ពុជាណាស់។

សូមបញ្ជាក់ថា អូស្ត្រាលី និងកម្ពុជា បានចែករំលែកប្រវត្តិសាស្រ្តជាមួយគ្នាជាងប្រាំពីរទសវត្សរ៍មកហើយៗការប្រគល់មកវិញនូវរូបចម្លាក់បុរាណទាំងនេះ គឺជាឧទាហរណ៍នៃកិច្ចសហប្រតិបត្តិការដ៏យូរអង្វែងរបស់ប្រទេសទាំង២។ ស្ថានទូតអូស្រ្តាលីប្រចាំកម្ពុជា បានគូសបញ្ជាក់ថា វាពិតជាកិត្តិយសណាស់ដែលអូស្រ្តាលី អាចការពារបេតិកភណ្ឌវប្បធម៌របស់ប្រទេសណាមួយ ព្រោះវាជាអត្តសញ្ញាណរបស់ប្រទេសជាតិនោះ៕