ព័ត៌មានជាតិ

អាជ្ញាធរសម្រេចផ្អាកចរាចរណ៍កំណាត់ផ្លូវជាតិលេខ៤សាជាថ្មី ដោយសារជំនន់ទឹកភ្លៀងហូរកាត់

បានផុស

១ year មុន

នៅ

ថ្ងៃព្រហស្បតិ៍ ៣ សីហា ២០២៣

ដោយ

កំពង់ស្ពឺ ៖ ជំនន់ទឹកភ្លៀងបានហូរកាត់ផ្លូវជាតិលេខ៤ សាជាថ្មីម្តងទៀត ដូច្នេះការធ្វើចរាចរណ៍ឆ្លងកាត់ទៅមកត្រូវបានផ្អាកជាបណ្តោះសន្ន ដើម្បីជៀសវាងកើតមានគ្រោះថ្នាក់ និងបង្កឲ្យប៉ះពាល់ដល់គ្រឹះក្រោមនៃផ្លូវផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចនគរបាលប៉ុស្តិ៍រដ្ឋបាលយាយម៉ៅពេជ្រនិល បានឲ្យដឹងថា ជំនន់ទឹកភ្លៀងបានកើតឡើងជាថ្មីម្តងទៀតនៅផ្លូវជាតិលេខ៤ ចំណុចស្ពានអូរគគី ត្រង់គីឡូម៉ែត្រលេខ (៩៩-១០០) ជាប់ព្រំប្រទល់រវាងស្រុកភ្នំស្រួច ខេត្តកំពង់ស្ពឺ ជាមួយស្រុកកំពង់សិលា ខេត្តព្រះសីហនុ នារសៀលថ្ងៃ០៣ ខែសីហា ឆ្នាំ២០២៣ នេះ។

កម្លាំងសមត្ថកិច្ចនគរបាលកំពុងបន្ដសម្រួលចរាចរណ៍សណ្ដាប់ធ្នាប់ និងសំណូមពរឲ្យអ្នកបើកបររថយន្តធុនធំផ្អាកការឆ្លងកាត់ជាបណ្ដោះអាសន្នរង់ចាំទឹកស្រកបន្ដិច ដើម្បីការពារកុំឲ្យខូចខាតផ្លូវ ឬកើតមានគ្រោះថ្នាក់ផ្សេងៗជាយថាហេតុ។

យោងតាមសេចក្តីរាយការណ៍បន្ថែម នៅវេលាម៉ោង១៦និង៣០នាទីរសៀល ថ្ងៃទី០៣ សីហានេះ កម្លាំងមូលដ្ឋានកងរាជអាវុធហត្ថស្រុកកំពង់សីលា និងកម្លាំងអាវុធហត្ថស្នាក់ការសន្តិសុខ ៤០២ ចំនួន១០នាក់ សហការជាមួយកម្លាំងគណៈបញ្ជាការឯកភាពរដ្ឋបាលស្រុក ដឹកនាំរួមដោយលោក ចាន់ ពន្លក អភិបាលរងស្រុកកំពង់សីលា ចុះគោលដៅត្រួតពិនិត្យតាមដានកម្ពស់ទឹកហូរ និងជួយសម្រួលចរាចរណ៍លើដងផ្លូវជាតិលេខ៤ នៅចំណុចព្រំប្រទល់រវាងស្រុកកំពង់សីលា និងស្រុកភ្នំស្រួច គីឡូម៉ែត្រលេខ (១០៦-១០៧) ស្ពានអូរគគីរ ដែលមានទឹកហូរកាត់លើស្ពាន កម្ពស់ ០.២០ម៉ែត្រ បណ្ដោយប្រវែងជាង ១០០ម៉ែត្រ។ ចំណែកអាកាសធាតុមេឃកំពុងភ្លៀងរលឹមស្រិចៗមិនទាន់រាំងនៅឡើយ។

សមត្ថកិច្ចបានបញ្ជាក់ថា ចំពោះមុខចរាចរណ៍តាមផ្លូវជាតិលេខ៤ ត្រង់ចំណុចខាងលើ អាជ្ញាធរស្រុកកំពង់សីលា និងស្រុកភ្នំស្រួច បានផ្អាកជាបណ្តោះអាសន្ន សម្រាបបងប្អូនប្រជាពលរដ្ឋដែលធ្វើដំណើរឆ្លងកាត់ទៅមក រាជធានីភ្នំពេញ ក្រុងព្រះសីហនុ និងកោះកុង អាចវាងតាមផ្លូវល្បឿនលឿន៕

ដោយ ៖ ភួង រដ្ឋា