ចិន​ព្រមាន​ជប៉ុន​ កុំ​គាំទ្រ​ការ​ពង្រីករបស់​អង្គការ​ណាតូ ចូលក្នុងតំបន់ឲ្យសោះ

ឯកអគ្គរដ្ឋទូតចិនប្រចាំរុស្សី លោក Zhang Hanhui និយាយថា ជប៉ុន និងប្រទេសផ្សេងទៀតគួរតែរៀនមេរៀនប្រវត្តិសាស្ត្រ ហើយមិនត្រូវក្លាយជាអ្នកគាំទ្រការពង្រីករបស់អង្គការណាតូ ចូលក្នុងតំបន់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកការទូតខាងលើ បានកត់សម្គាល់បែបនេះ នៅក្នុងបទសម្ភាសន៍ផ្តាច់មុខជាមួយសារព័ត៌មាន TASS ដែលចេញផ្សាយកាលពីថ្ងៃព្រហស្បតិ៍ទី៣ខែសីហា។ ក្នុងនោះ លោកបានរំលឹកឡើងវិញ នូវការព្រមានម្តងហើយម្តងទៀតរបស់ទីក្រុងប៉េកាំង អំពីគ្រោះថ្នាក់នៃការនាំយកប្លុកដែលដឹកនាំដោយសហរដ្ឋអាមេរិក មកកាន់តំបន់អាស៊ីបូព៌ានិងប៉ាស៊ីហ្វិក។

ឯកអគ្គរដ្ឋទូតនិយាយថា “យើងសូមណែនាំជប៉ុន និងអ្នកអែបអបដទៃទៀត ត្រូវរៀនមេរៀនប្រវត្តិសាស្ត្រឲ្យបានជ្រៅជ្រះ។ ពួកគេមិនគួរធ្វើឲ្យខូចសន្តិភាព និងស្ថិរភាពក្នុងតំបន់ដោយឯកតោភាគីទេ។ ពួកគេមិនគួរក្លាយជាអ្នកគាំទ្រការពង្រីករបស់អង្គការណាតូទៅក្នុងតំបន់បូព៌ាឡើយ”។

កាលពីដើមឆ្នាំនេះ អង្គការណាតូ បានពិចារណាបើកការិយាល័យទំនាក់ទំនងនៅក្នុងប្រទេសជប៉ុន ដែលនឹងក្លាយជាកន្លែងដំបូងរបស់ប្លុកនេះនៅក្នុងតំបន់។

ថ្វីបើទីក្រុងតូក្យូបញ្ជាក់ថា ខ្លួនកំពុងពិចារណាគំនិតនេះក៏ដោយ ប៉ុន្តែបារាំងបានចេញមុខបដិសេធគម្រោងនេះ ដោយទទូចថា ណាតូ គួរតែបន្តផែនការនៅតំបន់អាត្លង់ទិកខាងជើងជំនួសវិញ។

សកម្មភាពដ៏មានសក្តានុពលនេះ បានជំរុញឲ្យមានការប្រឆាំងយ៉ាងម៉ឺងម៉ាត់ពីប្រទេសចិន ដោយទីក្រុងប៉េកាំងសន្យាថា នឹងឆ្លើយតបចាស់ដៃ ប្រសិនបើប្លុកដឹកនាំដោយសហរដ្ឋអាមេរិក ព្យាយាមនិងខិតទៅជិតព្រំដែនរបស់ខ្លួន។

ត្រលប់ទៅខែកក្កដា ប្រទេសចិនក៏ប្តេជ្ញាដែរថា នឹងការពារអធិបតេយ្យរបស់ខ្លួន ព្រមទាំងប្រឆាំងនឹងការពង្រីកឆ្ពោះទៅទិសខាងកើតរបស់ណាតូ ទៅកាន់តំបន់អាស៊ីប៉ាស៊ីហ្វិក ដោយព្រមានថា រាល់សកម្មភាពដែលបំផ្លាញសិទ្ធិនិងផលប្រយោជន៍ស្របច្បាប់របស់ចិន នឹងត្រូវជួបប្រទះឆ្លើយតបដ៏ខ្លាំងក្លា៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Macron ព្រមានហានិភ័យ បើណាតូ ហ៊ានបើកការិយាល័យនៅ ជប៉ុន