​ប្រាក់​ចំណូលបានពីការលក់សំបុត្រចូលទស្សនាអង្គរកើនឡើងជាង ៥០០%

កម្ពុជារកចំណូលបានជាង ២០ លានដុល្លារ​ពីភ្ញៀវទេសចរអន្តរជាតិជាង ៤៣ ម៉ឺននាក់ ដែលទិញ​សំបុត្រ​ចូលទស្សនា ក្នុងតំបន់អង្គររយៈពេល ៧ ខែឆ្នាំ ២០២៣ ដែលចំនួននេះ​កើន​ឡើងជាង ៥០០% ​ប្រៀបនឹងរយៈពេលដូចគ្នា នៅឆ្នាំ ២០២២។

​យោងតាមសេចក្តីប្រកាស​ព័ត៌មាន​របស់​គ្រឹះស្ថាន​អង្គរបង្ហាញថា រយៈពេល ៧ ខែ ភ្ញៀវទេសចរបរទេស​ដែល​ទិញ​បណ្ណ​ចូល​ទស្សនា​រមណីយដ្ឋាន​អង្គរមាន ៤៣៩ ៣៦៥ នាក់។ ចំណែកប្រាក់ចំណូលទទួល​បានចំនួន​ ២០ ៣១៧ ៣៤៥ ដុល្លារកើនឡើង ៥០២,៧៩% ប្រៀបធៀបរយៈពេលដូចគ្នា ឆ្នាំ ២០២២។

​ភ្ញៀវទេសចរជាតិ និងអន្តរជាតិជាង ២,៦ លាននាក់ បានមកទស្សនារមណីយ​ដ្ឋានអង្គរ ក្នុងខេត្តសៀមរាប ក្នុងរយៈពេល ៧ខែដើមឆ្នាំនេះក្នុងនោះភ្ញៀវជាតិចំនួន ២,២០៣,៦៩៦ នាក់ និងភ្ញៀវបរទេសចំនួន ៤៣៩,៣៦៥នាក់។

ទិន្នន័យរបស់ក្រសួងទេសចរណ៍បង្ហាញថា នៅឆមាសទី១ ឆ្នាំ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ ២.៥៧ លាននាក់ ក្នុងចំណោមភ្ញៀវទេសចរសរុបចំនួន១១.១លាននាក់ ដែលមានការកើនឡើង ៤០៩% ធៀបនឹងរយៈពេលដូចគ្នាឆ្នាំ២០២២។

លោក តុប សុភ័ក អ្នកនាំពាក្យក្រសួងទេសចរណ៍បានឱ្យដឹងកាលពីពេលថ្មីៗនេះថា ចំពោះប្រភពទីផ្សារសំខាន់ៗមាន៖ ថៃ វៀតណាម ចិន ឡាវ សហរដ្ឋអាមេរិក កូរ៉េខាងត្បូង ឥណ្ឌូណេស៊ី បារាំង ចក្រភពអង់គ្លេស ម៉ាឡេស៊ី និងអូស្រ្ដាលី។

យោងតាមការព្យាករណ៍ចុងក្រោយនៅឆ្នាំ២០២៣នេះ កម្ពុជាអាចទទួលបានទេសចរអន្តរជាតិប្រមាណ៥លាននាក់ កើនឡើង ១២០% ធៀបនឹងឆ្នាំ២០២២៕