ការ​ឆ្លើយ​បំភ្លឺ​​ករណី​គ្រោះថ្នាក់ចរាចរណ៍រថយន្ដក្រុមហ៊ុនឡារីតា និងរថយន្ដ RAIZE នៅ​​ស្រុក​ជីក្រែង ​​បណ្តាល​ឱ្យ​មនុស្ស​ម្នាក់​ស្លាប់ និង​៣​នាក់​​​របួស​​

ករណីគ្រោះថ្នាក់ចរាចរណ៍នៅតាមបណ្ដោយផ្លូវជាតិលេខ ៦  ស្ថិតនៅភូមិព្រៃទទឹង ឃុំល្វែងឫស្សី ស្រុក​ជីក្រែង ខេត្តសៀមរាប កាលពីរសៀលម៉ោង ៤និង៣០នាទី ថ្ងៃទី ៣ ខែ សីហា ឆ្នាំ ២០២៣ រវាង​រថយន្ត​ក្រុមហ៊ុនឡារីតា និង រថយន្តតូយូតារៃ ដែលបើកបរបញ្ច្រាស់ទិសគ្នា ។

តំណាងក្រុមហ៊ុន ឡារីតា ​បាន​​ធ្វើ​ការ​បំភ្លឺ​ចំពោះសាធារណជនទាំងអស់ឱ្យបានថា ​ យោងតាមកាមេរ៉ាសុវត្ថិភាព ដែលថតបានពីក្នុងរថយន្ត ពេល​កំពុង​ធ្វើ​ដំណើរទិសដៅពី ភ្នំពេញ ទៅកាន់ខេត្តសៀមរាប លុះមកដល់កន្លែងកើតហេតុ រថយន្តរ​បស់​ភាគីម្ខាង​ទៀត​ (រថយន្តតូយូតារៃ) ដែលធ្វើដំណើរក្នុងទិសដៅផ្ទុយគ្នាពីសៀមរាប មក ភ្នំពេញ បានបើកបរយ៉ាង​លឿន​ចូល​មក​ក្នុងគន្លងផ្លូវស្តាំរបស់រថយន្តក្រុមហ៊ុន ហើយបុករថយន្តរបស់ក្រុមហ៊ុនយ៉ាងពេញទំហឹង (សូមមើល​វីដេអូ​កាមេរ៉ាសុវត្ថិភាព) បណ្តាលឱ្យមានមនុស្សម្នាក់ស្លាប់ និងរបួស ៣នាក់ ។ ក្រុមហ៊ុន ពិតជាសោកស្តាយ និង​សូមចូលរួមរំលែកទុក្ខចំពោះក្រុមគ្រួសារនៃសព ដែលបានបាត់បង់ជីវិតដោយសារគ្រោះថ្នាក់ចរាចរណ៍នេះ ។

ការបំភ្លឺរបស់តំណាងក្រុមហ៊ុននេះ គឺធ្វើឡើងដើម្បីផ្តល់ព័ត៌មានជូនដល់សាធារណជន និងមន្ត្រីមានសមត្ថកិច្ច ធ្វើការពិចារណាអំពីអង្គហេតុដែលបានកើតឡើង ជាជាងគ្រាន់តែស្តាប់ រឺ បានឃើញមួយជ្រុងនៃបញ្ហា រួចធ្វើ​បុរេ​វិនិច្ឆ័យតាមការយល់ឃើញរបស់ខ្លួន ដែលអាចធ្វើអោយក្រុមហ៊ុនដែលជាជនរងគ្រោះដោយ​សារតែការ​ធ្វេស​ប្រហែស​ក្នុងការបើកបររបស់ភាគីបង្កហេតុ ប្រឈមនឹងផ្លូវច្បាប់ ឬក៏បាត់ទំនុកចិត្ត​ពី​អតិថិជន​ដោយ​ប្រយោល ។ មិនតែប៉ុណ្ណោះរហូតមកដល់ពេលនេះ​អ្នកបើកបររថយន្តរបស់ក្រុមហ៊ុន​ត្រូវ​បាន​សមត្ថកិច្ច​ធ្វើ​ការ​ឃាត់​ខ្លួនមិនទាន់ដោះលែងនៅឡើយទេ ៕