ប្រទះឃើញកន្លាតក្នុងម្ហូបរបស់ហាង Pepper Lunch នៅប្រទេសសិង្ហបុរី

អតិថិជនម្នាក់នៅប្រទេសសិង្ហបុរីមានការភ្ញាក់ផ្អើលយ៉ាងខ្លាំង ព្រោះប្រទះឃើញកន្លាតងាប់ក្នុងបាយឆាសាច់មាន់ Pepper Lunch ដែលគាត់កុម្ម៉ង់តាម Grab។

កាលពីថ្ងៃទី៥ ខែសីហា លោក Steven Lee បានឲ្យដឹងថា កូនស្រីរបស់គាត់ដែលជាអ្នកកុម្ម៉ង់បាយឆារបស់ Pepper Lunch ប្រទះឃើញកន្លាតងាប់ក្នុងម្ហូប ក្រោយញ៉ាំបាន ២-៣ ម៉ាត់ទៅហើយ ធ្វើឲ្យនាងខ្ពើមរអើម និងរាងចាលជាខ្លាំង ។

ដោយការសង្ស័យអំពីស្តង់ដារអនាម័យនៃហាង Pepper Lunch លោក Lee សង្ឃឹមថា ទីភ្នាក់ងារអាហារសិង្ហបុរី (SFA) នឹងធ្វើការស៊ើបអង្កេតយ៉ាងម៉ត់ចត់ជុំវិញបញ្ហានេះ ។

ចំណែកឯភោជនីយដ្ឋានវិញ បានបញ្ចេញមតិនៅលើហ្វេសប៊ុករបស់គាត់នៅថ្ងៃបន្ទាប់ដែលថា “សុំអភ័យទោសអំពីបទពិសោធន៍អវិជ្ជមានរបស់អ្នកជាមួយការដឹកជញ្ជូនរបស់យើង ។ យើងសូមអភ័យទោសដោយស្មោះចំពោះភាពរអាក់រអួលដែលបង្កឡើង ។”

Pepper Lunch បានបញ្ជាក់ទៀតថា ការថែរក្សាគុណភាព និងអនាម័យនៃអាហាររបស់ពួកគេគឺមានសារៈសំខាន់បំផុត ហើយពួកគេនឹងធ្វើការស៊ើបអង្កេតលើបញ្ហានេះបន្ថែមដើម្បីធានាថា វាមិនកើតឡើងម្តងទៀតនៅពេលអនាគត ៕

ប្រែសម្រួល៖ វារី

ប្រភព៖ asianone

ចុចអាន៖ Snoop Dogg ធ្លាប់ចិញ្ចឹមសត្វកន្លាតឡើងធំប៉ុនក្រដាសប្រាក់