កក្កដា ជាខែក្តៅបំផុត ក្នុងកំណត់ត្រាពិភពលោក

ខែកក្កដា ឆ្នាំ២០២៣ គឺជាខែដែលក្តៅបំផុតមិនធ្លាប់មានសោះនៅលើផែនដី។ នេះបើតាមការបញ្ជាក់របស់អង្គការឃ្លាំមើលអាកាសធាតុ សហភាពអឺរ៉ុបនៅថ្ងៃអង្គារទី៨ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារតែរលកកម្តៅ និងអគ្គិភ័យនៅជុំវិញពិភពលោក, សីតុណ្ហភាពខែមុនគឺ ខ្ពស់ជាងកំណត់ត្រាដែលកំណត់ក្នុងខែកក្កដាឆ្នាំ២០១៩, ០.៣៣ អង្សាសេ ខណៈកាលពីឆ្នាំ២០១៩ សីតុណ្ហភាពជាមធ្យមគឺ ១៦.៦៣ អង្សាសេ ។

ការឡើងកម្តៅផែនដីប្រហែល១.២អង្សាសេ ចាប់តាំងពីចុងទសវត្សរ៍ឆ្នាំ១៨០០មក ដែលជំរុញដោយការដុតឥន្ធនៈហ្វូស៊ីល គឺបានធ្វើឲ្យរលកកម្តៅកាន់តែក្តៅ យូរជាងមុន និងញឹកញាប់ ក៏ដូចជាការកកើតកាន់តែច្រើន នៃអាកាសធាតុកាចសាហាវផ្សេងទៀតដូចជាព្យុះ និងទឹកជំនន់ជាដើម។

អង្គការឃ្លាំមើលអាកាសធាតុសហភាពអឺរ៉ុប Copernicus និយាយថា “រលកកម្តៅ បានវាយប្រហារនៅក្នុងតំបន់ជាច្រើននៃអឌ្ឍគោលខាងជើង រួមទាំងអឺរ៉ុបខាងត្បូងផងដែរ ខណៈសីតុណ្ហភាពលើសកម្រិតមធ្យម បានកើតឡើងលើបណ្តាប្រទេសមួយចំនួននៅអាមេរិកខាងត្បូង និងជុំវិញទ្វីបអង់តាក់ទិក”។

ស្របពេលជាមួយគ្នានោះ មហាសមុទ្ររបស់ពិភពលោក ក៏បានបង្កើតកំណត់ត្រាសីតុណ្ហភាពថ្មីផងដែរ ជាហេតុបង្កើនក្តីព្រួយបារម្ភអំពីផលប៉ះពាល់លើ អាកាសធាតុ ជីវិតសមុទ្រ និងសហគមន៍ឆ្នេរសមុទ្ររបស់ភពផែនដី៕

ប្រែសម្រួល៖ Vann Vann

ប្រភព៖ CNA

ចុចអាន៖ ខែកក្កដា ឆ្នាំ២០២៣ នឹងក្លាយជាខែក្តៅបំផុត ក្នុងប្រវត្តិសាស្ត្រភពផែនដី