ព័ត៌មានជាតិ

ពលរដ្ឋរង់ចាំគម្រោងស្ថាបនាផ្លូវក្នុងភូមិ ខណៈមេឃុំអះអាងនឹងសាងសង់នៅឆ្នាំ ២០២៤

បានផុស

១ year មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

Dy Bunnara

ផ្លូវលំមួយខ្សែនិងស្ពានឈើនៅក្នុងភូមិប្រលូងមានសភាពទ្រុឌទ្រោម ខណៈអាជ្ញាធរឃុំអះអាងថាគ្រោងសាងសង់នៅឆ្នាំ ២០២៤។

ផ្លូវលំមួយខ្សែដែលបំបែកពីស្ពានប្រលូងស្ថិតនៅក្នុងភូមិប្រលូង ឃុំសោប ស្រុកព្រែកប្រសប់ ខេត្តក្រចេះ មានភាពទ្រុឌទ្រោមយ៉ាងខ្លាំង។ ប្រជាជនដែលធ្វើដំណើរទៅចំការឆ្លងកាត់ជួបការពិបាក ជាពិសេសនៅរដូវវស្សាព្រោះត្រូវទឹកហូរកាត់ថែមទាំងទឹកលិចទៀតផង។

ប្រជាជនដែលធ្វើដំណើរតាមម៉ូតូខ្លះរលត់ត្រូវចុះបណ្តើរ ពេលខ្លះត្រូវប្តូរប្រេងម៉ាសុីនទើបអាចធ្វើដំណើរទៅមុខបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋម្នាក់ឈ្មោះ ព្រុញ ដែលរស់នៅក្នុងភូមិប្រលូង ដែលបានឌុបចៅប្រុសឆ្លងកាត់ស្ពានធ្វើឲ្យម៉ូតូរលត់បានចុះបណ្តើររហូតដល់គោកទើបបន្តទៅមុខទៀត។

ពលរដ្ឋរូបនេះបានបង្ហាញក្តីរីករាយនៅពេលទទួលដំណឹងថា អាជ្ញាធរឃុំនឹងចាប់ផ្តើមស្ថាបនាផ្លូវមួយខ្សែនេះនៅពេលខាងមុខ។

ដោយឡែកអ្នកភូមិម្នាក់ទៀតដែលជិះមកដល់ស្ពានឈើ រួចបានចុះបណ្តើរទើបទៅមុខបាន ៥០ ម៉ែត្រដល់ទំនាបបន្តិចដែលមានទឹកហូរកាត់លិចម៉ាស៊ីនម៉ូតូធ្វើឲ្យរលត់។

លោកថា ការធ្វើដំណើរមានការលំបាកជាពិសេសខែវស្សា ទឹកជន់លិច ហើយសភាពផ្លូវមានភាពរអិលពិបាកធ្វើដំណើរ។ លោកក៏រង់ចាំគម្រោងស្ថាបនាផ្លូវដែលអាជ្ញាធរបានអះអាងគ្រោងសាងសង់នៅពេលឆាប់ៗ ដែលនឹងកាត់បន្ថយការលំបាករបស់ប្រជាពលរដ្ឋ។

ដោយមើលឃើញផលពិបាករបស់ពលរដ្ឋ អាជ្ញាធរឃុំសោប បានធ្វើសំណើទៅរដ្ឋបាលស្រុកព្រែកប្រសប់ដើម្បីលើកគម្រោងសាងសង់ផ្លូវក្នុងឃុំ។

មេភូមិប្រលូង លោក វ៉ាយ តូច បានបញ្ជាក់ប្រាប់ថា នៅឆ្នាំ២០២៤ អាជ្ញាធរនឹងចុះមកកសាងស្ពានឈើនិងផ្លូវដែលមានប្រវែង ៨ គីឡូម៉ែត្រ។ លោកក៏សំណូមពរដល់ប្អូនប្រជាពលរដ្ឋដែលធ្វើដំណើរមេត្តាជួយថែរក្សាផងទំរាំដល់ពេលក្រុមហ៊ុនមកសាងសង់នៅពេលយូរទៀត។

មេភូមិប្រលូង លោក វ៉ាយ តូច

ដោយឡែកមេឃុំសោប លោក ចេង ស៊ុយឡាយ ក៏បានបញ្ចាក់បន្ថែមថា ផ្លូវដែលអាជ្ញាធរគ្រោងនឹងសាងសង់មានប្រវែង ៨ គីឡូម៉ែត ចាប់ពីស្ពានព្រែកប្រលូងទៅស្រែងៀតដែលនឹងចាប់ផ្តើមសាងសង់នៅដើមឆ្នាំ២០២៤។

ចំពោះថវិការលោកអះអាងថាគឺឃុំជាអ្នកចំណាយ។ យ៉ាងណាលោកបញ្ជាក់ថា ចំណាយលម្អិតលោកនឹងជូនដំណឹងនៅពេលក្រោយព្រោះក្រុមហ៊ុនកំពុងចុះសិក្សា។

ដំណឹងនេះបានធ្វើឲ្យបងប្អូនប្រជាជនមានភាពសប្បាយរីករាយយ៉ាងខ្លាំងនៅផ្លូវមួយខ្សែនេះធ្វើរួចរាល់ នឹងមានភាពងាយស្រួលក្នុងការធ្វើដំណើរ ក៏ដូចជាប្រមូលផលដំណាំទៅទីផ្សារផងដែរ។ ប្រជាពលរដ្ឋទាំងអស់សង្ឃឹមថា ឆ្នាំក្រោយនៅរដូវវស្សាលែងពិបាកធ្វើដំណើរទៀតហើយ៕

អត្ថបទ៖ លី រតនា

Related Topics:ខេត្តក្រចេះ