ជីវិតកម្សាន្ដ

ខាត់ សុឃីម បង្ហាញតម្រុយចង់ឲ្យកូនស្រី ខាត់ ចំរើន ប្រឡូកវិស័យបវរកញ្ញា

បានផុស

២ years មុន

នៅ

ថ្ងៃសៅរ៍ ១២ សីហា ២០២៣

ដោយ

តារាស្រីពហុជំនាញអ្នកនាង ខាត់ សុឃីម ដែលជាបងស្រីបង្កើតរបស់តារាកំប្លែងនាយ ខាត់ ចំរើន ថ្មីៗនេះ បានបង្ហើបពីតម្រុយបណ្ដុះកូនស្រីលោក ចំរើន ដើម្បីឲ្យចូលប្រឡូកក្នុងវិស័យសិល្បៈ ដើរតាមគន្លងឪពុកខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបង្ហើបពីសំណាក់តារាស្រីអ្នកនាង ខាត់ សុឃីម ដែលត្រូវជាអ៊ំស្រី បានបញ្ជាក់ពីបំណងចង់ឲ្យកូនស្រីទី ២ របស់លោក ខាត់ ចំរើន ចូលប្រឡូកវិស័យសិល្បៈតាមរយៈការត្រៀមខ្លួនចូលរួមប្រកួតប្រជែងវិស័យបវរកញ្ញានាពេលអនាគត។ អ្នកនាង ខាត់ សុឃីម បានចោទសំនួរទៅកាន់អ្នកគាំទ្រថា «តើប៉ុណ្ណឹងអាចប្រឡងបវរកញ្ញាបាននៅកូនក្រមុំ ខាត់ ចំរើន»។

ចំពោះការបង្ហាញនូវគោលបំណងបណ្ដុះបណ្ដាលកូនស្រីលោក ខាត់ ចំរើន ឲ្យចូលសិល្បៈពីសំណាក់អ្នកនាង ខាត់ សុឃីម ខាងលើនេះ ត្រូវបានមហាជនជាច្រើនចូលរួមសម្ដែងការគាំទ្រ និងសាទរ ខណៈមានការជូនពរឲ្យសម្រេចនូវបំណងនេះនាពេលអនាគតផងដែរ។

គេនៅចាំដែរថា កាលពីកន្លងមកជាមួយការបង្ហាញរូបភាពកូនស្រីលោក ខាត់ ចំរើន ដែលមានមុខមាត់ស្រស់សោភាតាមបណ្ដាញសង្គមហ្វេសប៊ុកនេះដែរ អ្នកនាង ខាត់ សុឃីម ក៏ធ្លាប់បានភ្ជាប់ជាមួយនឹងសំណេរថា «កូនស្រីរបស់ ខាត់ ចំរើន ពេលធំអាចឈានចូលប្រឡងបវរកញ្ញាបានទេមើលទៅបងប្អូន គិតលេងៗ ត្រេមុខកូនខ្មែរអាយុ ១៣ ឆ្នាំ កម្ពស់ ១.៥៨ អ៊ំចង់ឲ្យ ចាស្មីន ធំឡើងចូលក្នុងវិស័យមួយនេះ»។

គួររម្លឹកថា តារាចម្រៀង និងកំប្លែងលោក ខាត់ ចំរើន ដែលជាប្អូនប្រុសបង្កើតតារាពហុជំនាញអ្នកនាង ខាត់ សុឃីម បានទទួលមរណភាពកាលពីថ្ងៃទី ២០ ខែវិច្ឆិកា ឆ្នាំ ២០២២ បន្ទាប់ពីលោកបានពើបប្រទះនូវជំងឺជាច្រើនមុខ។ លោក ខាត់ ចំរើន មានកូន ៣ នាក់ គឺស្រីម្នាក់ និងប្រុសពីរនាក់ ដោយកូនប្រុសទីមួយឈ្មោះ ខាត់ ចំរើន មង្គល ,កូនស្រីទីពីរឈ្មោះ ខាត់ ចំរើន ចាស្មីន និងកូនប្រុសពៅ ឈ្មោះ ខាត់ ចំរើន សុខវ៉ិចបុត្រ៕

អត្ថបទ ៖ ចាន់រ៉ា