ទ័ពជើងទឹក រុស្ស៊ី បំពាក់មីស៊ីលល្បឿនលឿនជាងសំឡេងបន្ថែម លើនាវាមុជ​ទឹកដើមដោយថាមពលនុយក្លេអ៊ែរ

លោក Alexei Rakhmanov នាយកប្រតិបត្តិនៃក្រុមហ៊ុន United Shipbuilding Corporation (USC) បាននិយាយថា នាវាមុជទឹកដើរដោយថាមពលនុយក្លេអែរពហុជំនាញប្រភេទ Project 885M Yasen របស់រុស្ស៊ី នឹងត្រូវបានបំពាក់ឡើងវិញជាមួយមីស៊ីលល្បឿនលឿនជាងសំលេង Zircon ។

លោក Rakhmanov ប្រាប់សារព័ត៌មាន Sputnik ថា បច្ចុប្បន្ន នាវាមុជទឹកដើរដោយថាមពលនុយក្លេអ៊ែរថ្នាក់ Yasen ត្រូវបានបំពាក់ដោយកាំជ្រួចមីស៊ីលនាំផ្លូវ Kalibr និង Oniks រួមជាមួយនឹងមីស៊ីលបាញ់ចេញពីនាវាក្រោមទឹក Torpedo រួចទៅហើយ ហើយយើងនឹងបំពាក់បន្ថែមនូវមីស៊ីល Zircon លើនាវាមុជទឹកមួយនេះផងដែរ ។

នាយកប្រតិបត្តិនៃក្រុមហ៊ុន USC លើកឡើងថា “បន្ទាប់ពីការបំពាក់មីស៊ីល Zircon លើនាវាមុជទឹកដើរដោយថាមពលនុយក្លេអ៊ែរ Yesen នេះរួចហើយ, កងទ័ពជើងទឹករុស្ស៊ីនឹងទទួលបាននាវាចម្បាំងថ្មីយ៉ាងហោចណាស់ចំនួន ៥ គ្រឿងបន្ថែមទៀតនៅចុងឆ្នាំនេះ” ។

លោក Rakhmanov បានបន្ថែមទៀតថា “នៅឆ្នាំនេះ យើងបានបញ្ជូននាវាថ្មីចំនួន ៣ គ្រឿងរួចហើយ ជាពិសេសយើងក៏បានជួសជុលនាវាចាស់ៗបន្ថែមផងដែរ ហើយនៅចុងឆ្នាំនេះ យើងរំពឹងនឹងបញ្ជូននាវាយ៉ាងហោចណាស់ ៥ គ្រឿងបន្ថែមទៀតដល់កងទ័ពជើងទឹករបស់យើង” ។

គួរបញ្ជាក់ថា កាលពីដើមឆ្នាំនេះ ក្រុមហ៊ុនសាងសង់នាវា USC គ្រោងនឹងបញ្ជូនយ៉ាងហោចណាស់នាវាចំនួន ១១ គ្រឿងទៅឲ្យកងទ័ពជើងទឹករុស្ស៊ីត្រឹមក្នុងឆ្នាំ ២០២៣ នេះ រួមទាំងនាវាមុជទឹកដើរដោយថាមពលនុយក្លេអ៊ែរ និងដើរដោយប្រេងម៉ាសូតចំនួន ៥ គ្រឿងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មកដឹងមូលហេតុដែលលោក Wang Yi ទាញក្រវាត់ ក លែងពាក់ ពេលជួប រដ្ឋមន្ត្រីការបរទេស សិង្ហបុរី