ក្រោមយុទ្ធសាស្ត្រខ្សែក្រវាត់ និងផ្លូវ ចិនបានជួយកសាងស្ពានធំៗចំនួន១០ នៅកម្ពុជា

នៅចំពោះមុខលោក វ៉ាង យី រដ្ឋមន្ត្រីការបរទេសចិន លោក ហោ ណាំហុង និងលោក ស៊ុន ចាន់ថុល បានលើកឡើងថា ចិន គឺជាមិត្តដែកថែបរបស់កម្ពុជា ហើយក្រោមគំនិតផ្តួចផ្តើមខ្សែក្រវាត់ និងផ្លូវ ចិនបានជួយកសាងហេដ្ឋារចនាសម្ព័ន្ធដ៏ច្រើនដល់កម្ពុជា។ បើគិតមកទល់បច្ចុប្បន្ន ចិនបានកសាងផ្លូវថ្នល់ប្រមាណជាង៣០០០គីឡូម៉ែត្រ និងស្ពានធំៗចំនួន១០ នៅកម្ពុជា។

ស្ពានធំៗទាំង១០ ដែលកើតចេញពីចំណងទំនាក់ទំនងដ៏ល្អរវាងកម្ពុជា និងចិន ហើយកំពុងបម្រើឱ្យការដឹកជញ្ជូន និងធ្វើដំណើរឆ្លងកាត់ដ៏មានសារសំខាន់របស់ប្រជាជនកម្ពុជា នៅពេលសព្វថ្ងៃនេះ រួមមាន៖

១/ ស្ពាន​មិត្តភាព​កម្ពុជា​-ចិន​ សេកុង ​

ស្ពាន​មិត្តភាព​កម្ពុជា​-​ចិន​ សេកុង ស្ថិតនៅក្នុងខេត្តស្ទឹងត្រែង មាន​ប្រវែង​១ ០៥៧​ម៉ែត្រ ដែលបានចាប់ផ្ដើមសាងសង់ក្នុងឆ្នាំ២០០៤ ហើយដាក់សម្ពោធដាក់ឱ្យប្រើប្រាស់ជាផ្លូវការក្នុងឆ្នាំ២០០៨។ ស្ពាន​សេកុងនេះ ចំណាយការសាងសង់ខ្ទង់ ៧០លានដុល្លារ ដែលបានមកពីកម្ចីឥតការប្រាក់របស់រដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជាចំនួន ៤,៣លានដុល្លារ។

២/ ស្ពាន​មិត្តភាព​កម្ពុជា-​ចិន ​ព្រែក​ក្តាម

ស្ពាន​មិត្តភាព​កម្ពុជា-​ចិន ​ព្រែក​ក្តាម ស្ថិតក្នុងភូមិសាស្ត្រស្រុកពញាឮ ខេត្តកណ្ដាល ដែលមានប្រវែង៩៨១ម៉ែត្រ ទទឹង ១៣.៥ម៉ែត្រ។ ស្ពានព្រែកក្ដាម ដែលជាស្ពានឆ្លងកាត់ទន្លេសាប បានបើកការដ្ឋានស្ថាបនាក្នុងឆ្នាំ២០០៧ ហើយដាក់ឱ្យប្រើប្រាស់ជាផ្លូវការនៅខែឧសភា ឆ្នាំ២០១០ ដោយចំណាយថវិកាសាងសង់ប្រមាណជាង២៨លានដុល្លារ។

៣/ ស្ពាន​មិត្តភាព​កម្ពុជា-​ចិន​ ព្រែកតាមាក់

ស្ពាន​មិត្តភាព​កម្ពុជា-​ចិន​ ព្រែកតាមាក់ បានបើកការដ្ឋានស្ថាបនានៅខែមិថុនា ឆ្នាំ២០០៧ ហើយបានដាក់សម្ពោធឱ្យប្រើប្រាស់ជាផ្លូវការនៅថ្ងៃទី២៤ ខែមករា ឆ្នាំ២០១១។ ស្ពានព្រែកតាមាក់ ឆ្លងកាត់ទន្លេសាបស្ថិតនៅក្នុងស្រុកខ្សាច់កណ្ដាល ខេត្តកណ្ដាល ដែលមានប្រវែង១ ០៦៦ម៉ែត្រ ទទឹង ១៣.៥ម៉ែត្រ ដោយចំណាយទឹកប្រាក់សាងសង់ខ្ទង់៤៤លានដុល្លារ។

៤/ ស្ពាន​មិត្តភាព​កម្ពុជា-​ចិន ជ្រោយ​ចង្វារ

ស្ពាន​មិត្តភាព​កម្ពុជា-​ចិន ឬ ស្ពានជ្រោយ​ចង្វារទី២ បានសម្ពោធ​ដាក់ឱ្យប្រើប្រាស់ជាផ្លូវការនៅខែតុលា ឆ្នាំ២០១៥  ក្រោយត្រូវបានបើកការដ្ឋានសាងសង់រយៈពេល៣៨ខែ គឺក្នុងឆ្នាំ២០១១។ ស្ពានជ្រោយចង្វារទី២ ដែលមានប្រវែង ៧១៩ម៉ែត្រ បានចំណាយ​ថវិកាសាងសង់​ប្រ​មាណជាង ២៧លានដុល្លារ ជាកម្ចីឥណទានរបស់រដ្ឋាភិបាលចិន។

៥/ ស្ពាន​មិត្តភាព​កម្ពុជា-​ចិន ទន្លេមេគង្គ​

ស្ពាន​មិត្តភាព​កម្ពុជា​-​ចិន​ មេគង្គ ជាស្ពានទី២ ស្ថិតក្នុងខេត្តស្ទឹងត្រែង ដែលកើតចេញពីចំណងមិត្តភាពរវាងកម្ពុជា និងមិត្តចិន។ ស្ពានមេគង្គ ស្ទឹង​ត្រែង បាន​ចាប់ផ្តើម​សាងសង់នៅ​ក្នុង​ខែមេសា ឆ្នាំ​២០១២ ហើយ​បើកឱ្យប្រើប្រាស់ក្នុងឆ្នាំ​២០១៥។ ស្ពានឆ្លងកាត់ទន្លេមេគង្គនេះ មានប្រវែងជាង១ ៧៣០ម៉ែត្រ ដោយចំណាយទឹកប្រាក់ប្រមាណជាង១១៦លាន​ដុល្លារអាមេរិក។

៦/ ស្ពាន​មិត្តភាព​កម្ពុជា-​ចិន តាខ្មៅ

ស្ពាន​មិត្តភាព​កម្ពុជា-​ចិន តាខ្មៅ ដែលគេស្គាល់ថា ស្ពានព្រែកសំរោង មានប្រវែង៨៥៥ម៉ែត្រ ស្ថិតក្នុងភូមិសាស្ត្រក្រុងតាខ្មៅ។ ស្ពានព្រែកសំរោង បានសម្ពោធដាក់ឱ្យប្រើប្រាស់នៅខែសីហា ឆ្នាំ២០១៥ បន្ទាប់ពីបានបើកការដ្ឋានស្ថាបនានៅ ខែកក្កដា ឆ្នាំ២០១១។ ស្ពាន​ឆ្លង​ទន្លេ​បាសាក់​នេះ​ បាន​ត្រូវ​សាងសង់ឡើង​ដោយ​ក្រុម​ហ៊ុន​សំណង់​សៀង​ហៃ​ ដែល​​ចំណាយ​ថវិកា​ប្រមាណ ​៣៣​លាន​ដុល្លារ​អាមេរិក​ ជា​កម្ចីសម្បទាន​របស់​ប្រទេស​ចិន​ និង​មួយ​ចំនួន​ទៀត​ជា​ថវិកា​របស់​រាជ​រដ្ឋា​ភិបាល​កម្ពុជា​។​

៧/ ស្ពាន​មិត្តភាព​កម្ពុជា-​ចិន​ កោះធំ

ស្ពានមិត្តភាពកម្ពុជា-ចិន កោះធំ មានប្រវែង៤១៥ម៉ែត្រ នៅក្នុងស្រុកកោះធំ ខេត្តកណ្ដាល។ ស្ពានកោះធំ ចំណាយទឹកប្រាក់សាងសង់ប្រមាណជិត ២០លានដុល្លារ ត្រូវបានសម្ពោធដាក់ឱ្យប្រើប្រាស់ក្នុងឆ្នាំ២០១៧។ ស្ពាននេះ ជាប្រភេទស្ពានបេតុងសរសៃដែក សាងសង់ដោយក្រុមហ៊ុនសាងសង់ស្ពានថ្នល់ចិន ដែលមានទំហំទឹកប្រាក់សាងសង់ប្រមាណជាង ២២លានដុល្លារអាមេរិក។

៨/ ស្ពាន​អាកាស​មិត្តភាព​កម្ពុជា-​ចិន សែនសុខ

ស្ពានអាកាសមិត្តភាពកម្ពុជា-ចិន សែនសុខ ឬស្គាល់ថា ស្ពានអាកាសផ្សារដីហ៊ុយ ក៏ជាការជួយរបស់ចិនដល់កម្ពុជាដែរ។ ស្ពានអាកាសផ្សារដីហ៊ុយ មានប្រវែង៩៤២ម៉ែត្រ ចំណាយថវិកាសាងសង់ជាង១៧លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន និងថវិកាបដិភាគរបស់រាជរដ្ឋាភិបាល។ ស្ពានអាកាស នៅរាជធានីភ្នំពេញនេះ បានដាក់សម្ពោធឱ្យប្រើប្រាស់កាលពីឆ្នាំ២០១៨ បន្ទាប់ពីបានសាងសាង់អស់រយៈពេល ២៤ខែ។

៩/ ស្ពាន​មិត្តភាព​កម្ពុជា-​ចិន សិត្បូ

ស្ពាន​មិត្តភាព​កម្ពុជា-​ចិន សិត្បូ ជាស្ពានឆ្លងកាត់ទន្លេបាសាក់ ស្ថិតតាមបណ្ដោយផ្លូវក្រវាត់ក្រុងទី៣ ក្នុងភូមិសាស្ត្រខេត្តកណ្ដាលដែលមានប្រវែងសរុប ៩៩៦ម៉ែត្រ ហើយប្រើប្រាស់ថវិកាប្រមាណជាង ៥៦លានដុល្លារអាមេរិក។

១០/ ស្ពាន​មិត្តភាព​កម្ពុជា-​ចិន​ ស្ទឹងត្រង់​-ក្រូច​ឆ្មារ

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ជាស្ពានតភ្ជាប់រវាងអ្នកស្រុកស្ទឹងត្រង់ ខេត្តកំពង់ចាម និងស្រុកក្រូចឆ្នារ ខេត្តត្បូងឃ្មុំ។ ស្ពានមិត្តភាពកម្ពុជា-ចិននេះ បានចាប់ផ្តើមសាងសង់ក្នុងឆ្នាំ២០១៨ ហើយសម្ពោធដាក់ឱ្យប្រើប្រាស់ជាផ្លូវការកាលពីខែវិច្ឆិកា ឆ្នាំ២០២១ ក្នុងតម្លៃសាងសង់ជិត ៥៧លានដុល្លារអាមេរិក៕

ដោយ៖ ធឿន វ៉ាន់សុង