លោក ពូទីន បញ្ជាក់ថា​ ការប្រើប្រាស់លុយដុល្លារក្នុងពាណិជ្ជកម្មរវាងប្លុក BRICS កំពុងធ្លាក់ចុះ

ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយកាលពីថ្ងៃអង្គារថា ការប្រើប្រាស់ប្រាក់ដុល្លារអាមេរិកក្នុងការធ្វើពាណិជ្ជកម្មរវាងប្រទេសសមាជិក BRICS ដែលមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង កំពុងថយចុះ ខណៈដែលពួកគេទាំងនោះឆ្ពោះទៅរករូបិយប័ណ្ណជាតិរៀងៗខ្លួន ។

ថ្លែងតាមរយៈវីដេអូទៅកាន់កិច្ចប្រជុំកំពូល BRICS រយៈពេល ៣ ថ្ងៃនៅទីក្រុង Johannesburg ប្រទេសអាហ្វ្រិកខាងត្បូង លោក ពូទីន និយាយថា គោលបំណង និងដំណើរការដកការប្រើប្រាស់ប្រាក់ដុល្លារចេញពីប្លុកសេដ្ឋកិច្ច​ BRICS កំពុងតែ​ជំរុញល្បឿន ។

កាលឆ្នាំមុន​ ប្រាក់ដុល្លារ​ប្រើនៅក្នុងប្លុក BRICS មានចំនួន ២៨.៧ ភាគរយ ហើយក្នុងកិច្ចប្រជុំឆ្នាំនេះ នឹងពិភាក្សាលម្អិតអំពីបញ្ហាទាំងមូលដែលទាក់ទងនឹងការផ្លាស់ប្តូរទៅជារូបិយប័ណ្ណជាតិលើគ្រប់វិស័យនៃកិច្ចសហប្រតិបត្តិការសេដ្ឋកិច្ចរវាងប្រជាជាតិទាំង ៥ ។

BRICS ជាប្លុកនៃប្រទេសដែលមានសេដ្ឋកិច្ចរីកចម្រើនដែលរួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ខណៈបច្ចុប្បន្នតំបន់នេះបង្កើតបាន ១ ភាគ ៤ នៃសេដ្ឋកិច្ចពិភពលោក ដែលស្មើនឹង ១ ភាគ ៥ នៃពាណិជ្ជកម្មសកល ។

លោក​ ពូទីន បន្ថែមថា បណ្តា​ប្រទេស​ BRICS ដែលមានប្រជាជនជាង​ ៣ ពាន់លាននាក់ មានផលិតផលក្នុងស្រុកសរុប (GDP) ​រហូតដល់ ២៦ ភាគរយនៃពិភពលោក ។ ប្រទេស BRICS គឺនាំមុខប្លុក G7 ទាក់ទងនឹងភាពស្មើគ្នានៃអំណាចទិញដែលត្រូវបានព្យាករណ៍សម្រាប់ឆ្នាំ ២០២៣ នៅ ៣១.៥ ភាគរយ ។

ទន្ទឹមនោះលោក ពូទីន ក៏បានថ្កោលទោសចំពោះទណ្ឌកម្មដែលដាក់លើប្រទេសរបស់លោកផងដែរ ដោយនិយាយថា ស្ថានភាពសេដ្ឋកិច្ចពិភពលោកត្រូវបានប៉ះពាល់យ៉ាងធ្ងន់ធ្ងរដោយការអនុវត្តទណ្ឌកម្ម និងការបង្កកទ្រព្យសម្បត្តិដោយខុសច្បាប់ពីសំណាក់លោកខាងលិច ៕​

ប្រែសម្រួល៖ នាង រតនៈ

ប្រភព៖ Anadolu