គ្រូពេទ្យជំនាញ ៦ រូបដាក់ប្រចាំការសម្រាប់ព្យាបាលលោក ថាក់ស៊ីន

ក្រុមវេជ្ជបណ្ឌិតចំនួន ៦ រូបដែលមានឯកទេសផ្នែកជំងឺបេះដូង សួត និងជំងឺកូវីដ ១៩ ត្រូវបានចាត់តាំងឲ្យប្រចាំការសម្រាប់ព្យាបាលអតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ត្រា ដែលបច្ចុប្បន្នកំពុងសម្រាកព្យាបាលនៅមន្ទីរពេទ្យប៉ូលិសក្នុងទីក្រុងបាងកក ។

ពាក់ព័ន្ធនឹងបញ្ហានេះដែរ លោកឧត្តមសេនីយ៍ទោ Sophonrat Singhajaru ប្រធានពេទ្យប៉ូលិសបានឲ្យដឹងថា បច្ចុប្បន្ននេះស្ថានភាពរបស់លោក ថាក់ស៊ីន បានប្រសើរឡើងបន្តិចហើយ តាំងតែពីយប់ថ្ងៃពុធមកម្ល៉េះ ប៉ុន្តែគាត់នៅតែអស់កម្លាំង និងសម្ពាធឈាមឡើងខ្ពស់ ហើយកំពុងដាក់អុកស៊ីសែន ខណៈរហូតមកដល់ពេលនេះ ខាងពេទ្យក៏មិនទាន់មានការអនុញ្ញាតឲ្យចូលសួរសុខទុក្ខគាត់នៅឡើយដែរ ។

លោក Sophonrat អះអាងទៀត​ថា អតីត​នាយក​រដ្ឋមន្ត្រី​វ័យ ៧៤ ឆ្នាំរូបនេះគឺទទួលការព្យាបាលដូចគេដូចឯង មិនមែនក្នុងករណីពិសេសណាមួយនោះទេ ខណៈកាលពីពេលមុនៗអ្នកទោស​វ័យ​ចំណាស់​ផ្សេង​ទៀតក៏​ត្រូវ​បាន​ផ្ទេរ​ចេញពី​មន្ទីរ​អប់រំ​កែប្រែ​ទៅសម្រាកព្យាបាលនៅ​មន្ទីរ​ពេទ្យ​ដូចលោក ថាក់ស៊ីន ដែរ ។

លោកឧត្តមសេនីយ៍ទោរូបនេះបញ្ជាក់បន្ថែមថា លោក ថាក់ស៊ីន មិនត្រូវបានដាក់ខ្នោះដៃនោះទេ អំឡុងពេលសម្រាកព្យាបាលនៅមន្ទីរពេទ្យនេះ ព្រោះតាមច្បាប់ អ្នកទោសដែលមានអាយុក្រោម ១៦ ឆ្នាំ ឬលើសពី ៧០ឆ្នាំ ត្រូវបានលើកលែងពីការធ្វើបែបនេះ ដោយសារតែការដាក់ខ្នោះដៃ នឹងបង្កការលំបាកក្នុងការព្យាបាល ។

គួរបញ្ជាក់ថា លោក ថាក់ស៊ីន ដែលត្រូវតុលាកំពូលផ្ដន្ទាទោសដាក់ពន្ធនាគារ ៨ ឆ្នាំក្នុងសំណុំរឿងក្ដីផ្លូវច្បាប់ចំនួន ៣ ករណី ត្រូវបានបញ្ជូនចេញពីមន្ទីរពេទ្យក្នុងនាយកដ្ឋានអប់រំកែប្រែ Remand ទៅកាន់មន្ទីរពេទ្យប៉ូលិសក្នុងទីក្រុងបាងកកនៅម៉ោងប្រហែល ១ រំលងអធ្រាត្រថ្ងៃពុធ ដើម្បីព្យាបាលជំងឺលើសឈាម បន្ទាប់ពីលោកមានអាការៈតឹងទ្រូង និងគេងមិនលក់ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក ថាក់ស៊ីន ត្រូវបញ្ជូនចេញពីពន្ធនាគារទៅមន្ទីរពេទ្យទាំងកណ្ដាលយប់