ព័ត៌មានអន្ដរជាតិ

ទីបំផុត លោក ពូទីន ចេញមុខនិយាយហើយ ក្រោយការធ្លាក់យន្តហោះរបស់មេទាហានស៊ីឈ្នួល

បានផុស

១ year មុន

នៅ

ថ្ងៃសុក្រ ២៥ សីហា ២០២៣

ដោយ

នៅទីបំផុត ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចេញមុខនិយាយជាលើកដំបូងពាក់ព័ន្ធការធ្លាក់យន្តហោះរបស់មេទាហានស៊ីឈ្នួល Wagner ដោយហៅលោក Evgeny Prigozhin ថាជាបុរសមានទេពកោសល្យច្រើន ដែលបានរួមចំណែកយ៉ាងសំខាន់ ដល់ការតស៊ូប្រឆាំងនឹងពួកគាំទ្រលទ្ធិណាស៊ីនិយម នៅក្នុងប្រទេសអ៊ុយក្រែន។

លោក Evgeny Prigozhin (រូបថត៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងជាមួយអ្នកកាសែតនៅវិមានក្រឹមឡាំងកាលពីថ្ងៃព្រហស្បតិ៍ទី២៤ខែសីហា លោកពូទីននិយាយថា គាត់បានស្គាល់លោក Prigozhin តាំងពីដើមទសវត្សរ៍ឆ្នាំ១៩៩០មកម្ល៉េះ។

លោកពូទីនបន្តថា “លោក Prigozhin បានធ្វើខុសធ្ងន់ណាស់ក្នុងជីវិតរបស់គាត់ ប៉ុន្តែក៏ទទួលបានលទ្ធផលដែរ។ គាត់ជាអ្នកជំនួញមានទេពកោសល្យ ដែលធ្វើការនៅក្នុងប្រទេសរុស្ស៊ី ក៏ដូចជានៅទ្វីបអាហ្រ្វិកផងដែរ ទាក់ទងនឹងប្រេង ឧស្ម័ន លោហៈ និងត្បូងដ៏មានតម្លៃ”។

ទោះបីជាយ៉ាងណាក៏ដោយ លោកពូទីន មិនបានបញ្ជាក់ទេថាតើ លោក Prigozhin ស្លាប់ដោយសារធ្លាក់យន្តហោះមែនឬក៏អត់នោះទេ ឧប្បត្តិហេតុនេះ កើតឡើងត្រឹមពីរខែប៉ុណ្ណោះ បន្ទាប់ពីក្រុមទាហាន Wagner រូបនេះធ្វើការបះបោរបរាជ័យ ប្រឆាំងនឹងយោធារុស្ស៊ី ។

លោក វ្ល៉ាឌីមៀរ ពូទីន (រូបថត៖ Getty Images)

ស្របពេលជាមួយគ្នានោះ លោក ពូទីន បានសម្តែងការរំលែកទុក្ខ ចំពោះក្រុមគ្រួសារមនុស្សទាំង១០នាក់ដែលស្លាប់ក្នុងហេតុការណ៍ធ្លាក់យន្តហោះ ហើយប្តេជ្ញាថា នឹងបើកការស៊ើបអង្កេតលើឧបទ្ទវហេតុនេះ។

គួរបញ្ជាក់ជាថ្មី លោក Prigozhin ស្ថិតក្នុងបញ្ជីអ្នកដំណើរលើយន្តហោះឯកជន Embraer ដែលធ្លាក់កាលពីថ្ងៃពុធនៅក្នុងតំបន់ Tver ខណៈធ្វើដំណើរចេញពីទីក្រុងមូស្គូទៅកាន់ទីក្រុង St. Petersburg ហើយអ្នកដំណើរទាំង៧នាក់ និងអាកាសយានិក ៣នាក់ត្រូវបាត់បង់ជីវិត ៕

ប្រែសម្រួល៖ Vann Vann

ប្រភព៖ RT

ចុចអាន៖ ៤ ឆ្នាំមុន លោក Prigozhin ក៏ត្រូវគេប្រកាសថាធ្លាក់យន្តហោះស្លាប់ដែរ ស្រាប់តែ ៣ ថ្ងៃក្រោយ បង្ហាញខ្លួនវិញ