ករណីបុរសម្នាក់ទះកំផ្លៀងមនុស្សស្រី សមត្ថកិច្ចកំពុងស្រាវជ្រាវរកមុខជនបង្ក

លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ អះអាងថា ករណីបុរសម្នាក់ប្រើហិង្សា ដោយទះកំផ្លៀងទៅលើយុវតីម្នាក់ គឺពេលនេះសមត្ថកិច្ចកំពុងស្រាវជ្រាវរកមុខជនបង្ក។ ករណីនេះ ត្រូវបានមហាជនជាច្រើនបានចែករំលែកតៗគ្នា និងបានបញ្ចេញប្រតិកម្មយ៉ាងខ្លាំងនៅលើបណ្តាញសង្គមហ្វេសប៊ុក។

បើតាមឃ្លីបវីដេអូមួយ ដែលបានចែកចាយលើបណ្ដាញសង្គមហ្វេសប៊ុក កាលពីថ្ងៃទី២៥ ខែសីហា មានមនុស្សប្រុស-ស្រី៣នាក់ បានឈ្លោះប្រកែកគ្នារឿងជិម៉ូតូសាចទឹក នៅពេលធ្វើដំណើរលើដងផ្លូវ។ ប៉ុន្តែ អ្វីគួរឱ្យចាប់អារម្មណ៍នោះ គឺគ្រាន់តែសាចទឹកដាក់គ្នាបន្តិចបន្តួច បែជាបុរសម្នាក់ហ៊ានលើកដៃទះមនុស្សស្រី ហើយបង្កឱ្យមានការប្រតាយប្រតប់គ្នា។

ទាក់ទិននឹងករណីនេះ អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានប្រាប់ «កម្ពុជាថ្មី» ឱ្យដឹងនៅថ្ងៃនេះថា ករណីនេះ បានកើតឡើងនៅសង្កាត់ទឹកថ្លា ខណ្ឌសែនសុខ។ លោក សាន សុខសីហា បានអះអាងថា មកដល់ពេលនេះ សមត្ថកិច្ចបានទទួលពាក្យបណ្តឹងពីជនរងគ្រោះរួចហេីយ ពាក់ព័ន្ធនឹងការប្រើហិង្សានេះ ដោយសមត្ថកិច្ចកំពុងសហការស្រាវជ្រាវរកជនបង្ក៕