ខូច​ខាតមួយ​ចំនួនធំ អគ្គិភ័យឆាបឆេះទូរថភ្លើងនៅ​តំបន់​បឹងកក់​យប់មិញ

អគ្គិភ័យឆាបឆេះបំផ្លាញរថភ្លើងនិងទូរថភ្លើងអស់មួយចំនួនធំ បង្កឱ្យមានការភ្ញាក់ផ្អើល​នៅ​វេលាម៉ោង ៣ និង ១០ នាទីទាប​ភ្លឺថ្ងៃទី ២៧ ខែសីហា ឆ្នាំ២០២៣ នៅចំណុចផ្លូវរ៉ារថភ្លើង ( តំបន់បឹងកក់ ) ក្នុងភូមិ២ សង្កាត់ស្រះចក ខណ្ឌដូនពេញ។

តាមប្រភពព័ត៌មានពីពលរដ្ឋបានឱ្យដឹងថា នៅមុនកើតហេតុ មានក្រុមកម្មករសម្រាកនៅក្នុងទូរថភ្លើងមួយដែលនៅជាប់នឹងរថភ្លើងមួយខ្សែដែលឈប់នៅក្បែរនោះ។ លុះវេលាកើតហេតុ គេក៏ឃើញមានជាអណ្តាតភ្លើងយ៉ាងសន្ធោសន្ធៅ បានឆាបឆេះចេញពីទូររថភ្លើងនោះតែម្តង ក៏បង្កឱ្យមានការភ្ញាក់ផ្អើល នឹងរាយការណ៍ទៅកាន់សមត្ថកិច្ចដើម្បីចុះអន្តរាគមន៍។

បន្ទាប់ពីទទួលបានព័ត៌មាន កម្លាំងសមត្ថកិច្ចមូលដ្ឋាន រួមទាំងរថយន្តពន្លត់អគ្គីភ័យជាច្រើនគ្រឿងបានចុះអន្តរាគមន៍ ធ្វើការបាញ់ទឹកទប់ស្កាត់ និងពន្លត់ការឆាបឆេះ។ ក្រោយការអន្តរាគមន៍ អណ្តាតភ្លើងបានរលត់ទៅវិញក្នុងរយះពេល ១ ម៉ោង ដោយសមត្ថកិច្ចប្រើប្រាស់រថយន្តពន្លត់អគ្គីភ័យអស់ ៣ គ្រឿង ក្នុងចំណោមរថយន្ត ០៥ គ្រឿង ដែលបានចុះអន្តរាគមន៍ដល់ទីតាំងកើតហេតុ។

ក្នុងករណីនេះដែរ ពុំមានបណ្តាលឱ្យមនុស្សណាម្នាក់រងរបួស ឬប៉ះពាល់ដល់អាយុជីវិតនោះឡើយ ដោយអគ្គីភ័យបាន​ឆាប​ឆេះបំផ្លាញទូររថភ្លើងនៅក្បែរនោះទាំងស្រុង និងផ្នែកមួយចំនួននៃរថភ្លើងមួយខ្សែដែលនៅជាប់នោះផងដែរ។ ចំពោះការឆាបឆេះ សមត្ថកិច្ចជំនាញនៅមិនទាន់អាចបញ្ជាក់បានពីមូលហេតុនៅឡើយនោះទេ រង់​ចាំធ្វើកោសល្យវិច្ច័យបន្ថែមនៅពេលក្រោយ៕

អត្ថបទ៖ សុខា