នាវាអូសចៃរ៉ា ជប៉ុន ចាប់ផ្ដើមចេញរកគ្រឿងសមុទ្រសាជាថ្មី ក្រោយការបង្ហូរ​ទឹកសំណល់ចេញពីរោងចក្រនុយក្លេអ៊ែរ

នាវាអូសចៃរ៉ាជប៉ុនប្រមាណ ២០ គ្រឿងបានចេញដំណើរពីកំពង់ផែក្នុងខេត្ត Fukushima ដើម្បីរកគ្រឿងសមុទ្រជាលើកដំបូង ចាប់តាំងពីរដ្ឋាភិបាលលបានចាប់ផ្ដើមបង្ហូរទឹកសំណល់ចេញពីរោងចក្រថាមពលនុយក្លេអ៊ែរ Fukushima Daiichi ចូលក្នុងមហាសមុទ្រប៉ាស៊ីហ្វិក ។

ការចាប់ផ្ដើមចេញនេសាទរបស់នាវាអូសចៃរ៉ាបានកើតមានឡើងនៅ​កំពង់ផែ​នេសាទ Matsukawaura នៃ​ទីក្រុង Soma ស្របពេលដែលរដូវនេសាទនៅក្នុងខេត្តក៏បានបើកឡើងវិញផងដែរនៅថ្ងៃសុក្រនេះ បន្ទាប់ពីការហាមឃាត់រយៈពេល ២ ខែដើម្បីការពារធនធាននៅក្នុងសមុទ្រ ។

ទន្ទឹមនោះ មន្ត្រីសមាគមជលផលជប៉ុនលោក Kikuchi Masahiro ក៏បានបង្ហាញការសោកស្ដាយផងដែរ ដោយសារតែរដូវនេសាទមកដល់ ស្របពេលដែលក៏មានការបង្ហូរទឹកសំណល់ចេញពីរោងចក្រថាមពលនុយក្លេអ៊ែរ Fukushima Daiichi ចូលក្នុងមហាសមុទ្រប៉ាស៊ីហ្វិក ។

ពាក់ព័ន្ធនឹងបញ្ហានេះដែរ ប្រធានសមាគមអ្នកនេសាទប្រចាំខេត្ត Fukushima លោក Takahashi Toru បាននិយាយថា លោកកំពុងមានការព្រួយបារម្ភចំពោះប្រជានេសាទសម្រាប់ថ្ងៃដំបូងនៃការនេសាទ ហើយមិនដឹងថា ពួកគេអាចរកត្រី ឬគ្រឿងសមុទ្រផ្សេងទៀតបានឬអត់នោះទេ ។

លោកបញ្ជាក់ថា ការបង្ហូរទឹកសំណល់ចេញពីរោងចក្រថាមពលនុយក្លេអ៊ែរកំពុង​ក្លាយ​ជា​ប្រធានបទ​ក្តៅ​ក្នុង​ប្រទេស​ជប៉ុន និង​កន្លែង​ផ្សេង​ទៀត ជាពិសេសប្រទេសចិនតែម្ដង ដោយសារតែចិនបានហាមប្រាមការទិញគ្រឿងសមុទ្រពីជប៉ុនរួចទៅហើយ ។

គួរបញ្ជាក់ថា ប្រទេសចិន គឺជាទីផ្សារដ៏ធំបំផុតសម្រាប់ការនាំចេញអាហារសមុទ្ររបស់ប្រទេសជប៉ុន ដែលមានចំនួន ៦០០ លានដុល្លារកាលពីឆ្នាំមុន ខណៈក្នុង​ចំណោម​ផលិតផល​ដែល​មាន​ការ​ពេញ​និយម​បំផុត​នោះ​មាន ​ខ្យង ត្រីធូណា កាំប្រម៉ាសមុទ្រ ត្រីឆ្ពង់ក្រហម និងឈ្លើងសមុទ្រជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តម្លៃត្រីធូណាក្នុងមួយគីឡូក្រាមនៅ ជប៉ុន ក្រោយការបង្ហូរទឹក​សំណល់ចេញពីរោងចក្រនុយក្លេអ៊ែរ Fukushima